除咗群星拱照，以及打足全場毫無廁所位，《Avengers︰Age of Ultron》另一令人印象深刻之處，就係帶出人工智能AI就似水一樣，既能載舟亦能覆舟，救人或滅世就在一念之差，其實呢個道理早喺1977年於日本首播嘅《大鐵人17號》已經講咗，原本用嚟消滅人類嘅大鐵人17號（下文簡稱「17號」），最後捨生成仁令全人類逃過一劫，唔只賺人熱淚，17號嘅出位機設，仲一直賺咗唔少玩具迷嘅血汗錢，繼1977及84年嘅超合金後，最近又有全新合金版推出，唔只Chok咗，而且係最扭得嗰個！

拜可動性高所賜，唔只出掌，就連起飛腳及單膝跪等原本無計可施嘅甫士，依家都一一做到。

膊頭可以高高舉起，大腿又唔只前後，仲可以向外擺，留意腰甲仲可以揭起，唔會阻住雙腳活動。

10隻手指都可以獨立活動，點只以前嘅超合金，依家好多合金玩具都做唔到。

腰間內藏關節，拉出後可以大幅度前後拗腰。

長方形腹肌向左右拉開，就可發動必殺技「原子能死光」。

嫌腹肌中間有條罅唔好睇？隨盒另備組件更換。

全高約30cm，係有史以來最大隻嘅合金版17號。

由左至右，分別係GA-81、GD-17及World Scope版本，留意後者嘅紅色位置都用咗合金製成。

要數最有代表性嘅17號玩具，必然係於1977年首度發行、84年復刻嘅POPY DX超合金版本GA-81，以及99年由Bandai推出嘅超合金GD-17，兩者都可以重演劇中「摺埋變形」嘅設計（GD-17仲可以電動變形）；至於最近上架、由日本新廠World Scope製作嘅全新版本，竟然冇咗呢道招牌菜，仲有乜好玩呀？

變形換取可動性

老老實實，唔識變形嘅17號，筆者初初聽到都覺得好失望，不過見識過實物之後，總算明白World Scope嘅苦衷。無論係GA-81或者GD-17，可動性都只算一般，GA-81都仲好啲，雙腳可以獨立擺動，GD-17就因為要內藏電線、齒輪，尤其是要將一對腳掌打通，挖空內部放電池，兩隻腳好似殭屍一樣要拍埋一齊，冇得分開獨立活動。既然變形呢招早就有人用過，World Scope一於試新嘢，以變形換取可動性，除咗10隻手指都可獨立活動，好似膊頭、髖位以及膝頭都夠位內藏齒輪關節，增加活動幅度之餘，仲夠力Hold住甫士。除此之外，腰位四周嘅裝甲都可以揭起，減少對大腿擺動構成嘅障礙，呢一招又係前無來者。至於更出位嘅新招，就係將上半身向上拉起，腰位就會露出內藏關節，以前做唔到嘅前後拗腰甫士，依家就可以大幅度做畀你睇。

必殺技忠實重現

可動性全面進化之餘，新版17號嘅另一特色設計，就係完整重現必殺技「原子能死光」。喺原來嘅機設之中，17號嗰三件長方形腹肌會向左右分開，露出內藏嘅死光炮，再對準敵人發射，GA-81就純粹以換件表達，而且組件造型完全唔似劇中設計，令玩家冇晒投入感；GD-17仲失真，因為要兼及電動變形，索性刪除埋呢招。隔咗38年，終於等到World Scope將呢招完全移植到玩具版身上，而且呢件Gimmick腹肌可以拆落嚟，換上另一款組件，後者冇發炮機關，但正因為咁令組件中間唔會出現一條直線嘅罅隙，藉此迎合造型派嘅用家口味。另一方面，單以合金版玩具嚟講，World Scope版本高約30cm，高過晒GA-81及GD-17，而且整體造型都Chok過以前，論造型美以及可動性，都係有史以嚟最出色嘅版本，至少可以同「唔識變形」呢個遺憾扯平啩！