人情味嘅小店，執吓一間又一間，麵舖、士多、茶餐廳等等，就連玩具店都無一幸免，唔通過多幾年，因為「土地供應不足」呢句萬能Key，香港人買乜都要幫襯千篇一律嘅連鎖店、大商場？老套啲講句︰咪等失去咗先嚟珍惜，位於旺角煙廠街嘅Ant Toy，雖然歷史唔算耐，但係充滿港式小店情懷，老闆Jacky仲公諸同好，喺店內Show咗唔先懷舊珍藏公諸同好，又有兩位貓千金駐場耍萌，仲唔係充分理由，氹埋女朋友/老婆陪你一齊睇玩具？

除咗玩具，Ant Toy嘅另一特色係極具親和力嘅肥貓店長。

除了懷舊珍藏，亦都有新品發售，例如Acid Rain最新推出嘅Laurel Marine，已經喺Ant Toy上架。

極度罕有嘅迷你高達金屬公仔，除咗圖中嘅高達（左）及老虎專用飛行器，Jacky仲有同系嘅渣古、老虎、魔蟹、勇士，甚至太空母艦等深入民心嘅款式，幾乎全套有齊，我好葡萄囉！

位於煙廠街嘅樓上舖Ant Toy，比起一般玩具店大得多，仲好有屋企Feel。

店內有唔少古稀珍品，包括有成30幾年歷史嘅大鐵人17號（左）及鐵甲萬能俠2號（右）大膠公仔。

老闆Jacky表面怕怕醜醜，其實好鍾意傾玩具經，筆者都從中學咗唔少嘢，佢仲將半邊舖頭變埋做珍藏展館，可說功德無量。

作為樓上舖、位於煙廠街嘅Ant Toy，雖然搬到上址只係半年左右，不過此店其實開業已經有十數年，去開旺角嘅玩具迷，十之八九都識得呢隻「蟻」；「蟻穴」主人Jacky唔只係老闆，仲係收藏家、動漫迷，今次搬到煙廠街，就實現咗一個多年願望，他表示：「今次終於搵到一間地方鬆動啲嘅單位，賣嘢之餘，仲可以擺放到部分珍藏出嚟，有同道中人上嚟參觀，係好開心嘅事。」

三十年珍藏 日本難尋

雖然店內嘅珍品只係Jacky收藏嘅鳳毛麟角，但係件件都資歷十足，喺一般嘅玩具店好難見到，鎮山之寶就有70年代嘅大鐵人17號及鐵甲萬能俠2號大膠，仲有《天空之城》及《Macross》嘅Mini Figure，以及《IQ博士》嘅Cosplay套裝，相信好多90後，甚至80後嘅玩具迷都未見過。筆者嘅至尊推介係迷你高達公仔，整個系列以鉛製成，Jacky仲Keep得好好，隻隻齊盒齊說明書；呢套精品唔只有成30幾年歷史，而且喺日本都好難搵，何況香港？

貓咪駐場 引爆萌力

既係玩具店，又係展覽館之餘，Ant Toy還有另一特色，事關Jacky仲係愛貓之人，店內就有兩位好乖嘅貓千金幫手睇舖，開舖咁耐都未試過掃跌Jacky嘅珍藏外，仲唔怕人，肯畀你摸，如果閣下嘅女朋友/老婆係貓奴，平時同佢逛玩具店就話驚佢悶，去Ant Toy就冇呢個煩惱啦，你有你睇玩具，佢就繼續發揮貓奴本性，心情好嘅話，可能仲會格外開恩，畀你買多一、兩件玩具帶返屋企呢！

Facebook：www.facebook.com/AntToy1996

地址：旺角煙廠街31號2/F