Xperia C4 Dual 搞鬼博Like

除咗美顏、玩Cute樣，自拍有時都要搞吓新意思，咁就不妨一試Sony Xperia C4 Dual；此機除咗備有500萬像素前置鏡頭，更配備前置LED燈，夜晚影Selfie都冇問題；而且內置多個自拍特效，隨時為人臉加入紅唇，甚至變老、變動物大頭都得，超級過癮，呃Like話咁易！

預載Android 5.0作業系統，操作順暢。$2,898

前置LED燈，夜間自拍冇問題。

機側有實體快門鍵，待機時長按即進入拍攝介面。

兩個卡槽都係用nanoSIM，均支援4G制式。

機背下方設有喇叭，音量輸出極強。

Xperia C4 Dual 機身改用圓角設計，手感比上代好。

自拍區
「AR面具」入面嘅猩猩效果夠晒兇狠！

仲可以換上老人家模樣，都Key得唔錯。

用「風格效果」中嘅「繪畫」效果，可加上虛擬彩繪，相當有趣。

Xperia C4 Dual係Xperia C3 嘅後繼機，同樣備有5.5吋屏幕，不過解像度就由720p提升至1,080p，配合Mobile BRAVIA Engine 2技術，顯示更細緻，而銳利度同對比度都提高咗。雖然採用同尺寸屏幕，Xperia C4 Dual機身長、闊、厚度以至重量統統比上代減少，亦由上代嘅方角轉為圓角設計，手持好舒服。一如上代，此機繼續提供系列獨有嘅薄荷綠色，感覺清涼，唔啱口味的話，亦可以揀選大路嘅黑、白兩色。

玩味自拍

新機最大賣點當然係自拍功能，前置500萬像素鏡頭支援25mm廣角及LED燈，規格與上代一樣，不過就將玩味功能大幅提升。當中較特別就係「風格效果」，除咗可以為人面加入柔膚、紅唇、古銅、氣泡、繪畫等效果外，亦可以加入心心眼、閃亮等眼睛效果，而且連前置LED嘅光暗輸出都可以調校，玩法多多。嫌未夠「爆」，就一定要試「AR面具」，提供女人、男人、老人家、貓仔、獅子、猩猩等模樣，實時Key上人臉，超過癮；而且大家仲可以影低朋友、動物嘅大頭，隨意Key亦得，搞鬼度滿分。

靚聲喇叭

規格方面，Xperia C4 Dual採用MediaTek MT6752 1.7GHz八核心處理器、2GB RAM及16GB ROM，效能比上代有所提升。話明叫「Dual」，當然引入雙卡雙待功能，兼且支援中港4G制式，適合經常北上人士。值得一提，雖然機背下方僅得一個細小喇叭，不過音量輸出最高可達87分貝，配合自家ClearAudio+技術，睇片、聽歌播放效果相當唔錯。