今年係單數年，冇世界盃，又冇歐國盃，足球品牌以守為攻亦係無可厚非，不過凡事都跟足常規又何來驚喜？今年夏天，adidas football不但有新波Boot推出，而且誠意爆燈，唔要用住先，否決舊常規，我要真創意！以往嘅Predator、f50、nitrocharge及11pro都光榮退役，冇得留低，取而代之係X15、Ace15及Messi15，以全新嘅足球思維主導波Boot設計，球迷們準備好接招未？

X15.1 FG/AG $1,699

鞋身外層採用X-Cage結構，以輕量化嘅方式加強穩定性。

全新嘅鞋領設計，能夠緊緊包圍足踝，加強貼腳效果。

X-Claw嘅鞋釘設計相當特別，就以前掌區為例，外長內短，有利球員加速、轉向。

鞋身以X-Skin為主要用料，既輕且薄，有助速度型球員盡展所長。

Ace15.1 FG/AG $1,699

X15與Ace15嘅鞋釘尺寸都偏短，Ace15就更加明顯，可以應對真草（FG）與仿真草（AG）兩種場地需要。

鞋釘數目比傳統款式為多，就連鞋底中間都有細釘，令用家更易使出「搓波」招數。

鞋身前至中段都用上3D設計嘅Control Web，凹凸不平的網形結構，可以增加對足球嘅摩擦作用。

adidas Football的#BeTheDifference新攻勢，就由左右先鋒X15和Ace15揭開序幕，兩者的星級用家分別有靴里拉（右）和奧斯爾（左）。

MessiGAMETRAX的鞋釘乃全新設計，用上圓釘和三角釘的混合編排，設計獨到。

右腳嘅鞋舌與左腳嘅鞋尾，都有美斯專屬嘅M字形標誌點綴。

MessiTOUCH鞋面貼腳之餘又可加強控球能力，至於銀藍色的設計，靈感取自美斯的祖國阿根廷。

鞋尾用上支架形的MessiFRAME外，還有美斯的個人標誌。

Messi15.1 FG/AG $1,699

早前於柏林adidas The BASE舉行嘅2V2 #BeTheDifference小型足球賽，將於七月移師香港舉行，並已接受網上報名。

為慶祝adidas Sports Base盛大開幕，J.Lin將於本月尾訪港，掀起Take on Summer嘅運動風。

位於中環海濱嘅adidas Sports Base將於本月尾開幕，集足球、籃球、瑜伽、體能訓練及跑步等運動場地於一身。

無論跑步、籃球、足球等運動產品，開創一個成功嘅產品系列絕非易事，而大部分品牌嘅做法都係穩中求進，定時定候為原有系列推出新版本，改善舊款嘅功能設計之餘，又保留系列特色，照理係冇得輪；不過諗深一層，喺固有嘅系列傳統下小修小補，堪稱進步，但唔使旨意有大突破。adidas原有嘅主打四大波Boot—Predator、f50、nitrocharge及11pro，分工清晰，亦有固定客源，其實依照近年嚟嘅傳統—兩年一大改、每年一小改，已經可以為三間牌帶嚟既可觀又穩定嘅利潤。勢估唔到係adidas竟然咁夠膽、咁捨得，敢於打倒昨日的我，重新嚟過嘅新波Boot，又有幾革命性先？

X15 愈亂愈有機

正所謂性格決定命運，從事足球用品開發超過半世紀嘅adidas發現，新世代嘅球員大致可分為兩類人，一類係英雄主義者，鍾意憑個人技術硬闖龍潭，喺對方禁區引起混亂（Chaos），對於呢類次次都要攞波上腳盤、扭、射嘅球員而言，最稱心嘅波Boot要求就係輕巧、貼腳、反應快，輕巧型波Boot乘時而起，不過針冇兩頭利，鞋身單薄咗，保護能力亦難免打折扣，呢個矛盾終於由X15破解。最明顯嘅特徵係鞋領內加多一層低筒嘅Techfit彈性物料，並且延伸至鞋舌位置，與傳統設計相比，為足踝提供更大嘅貼腳度與支撐力，切合盤扭時頻頻轉向嘅需要。至於鞋身就以X-SKIN為主結構，用上三層式物料製成，薄身特性有利傳送球感外，難得之處係保護性比一般嘅薄身合成物料為高，加上鞋身兩側仲有X-Cage，緊緊撐起腳掌，減少腳掌喺鞋籠內出現過分滑動。鞋釘亦係全新設計，喺X-Claw布局下，前掌外圍嘅鞋釘比裏面嘅長，保持高度抓地力之餘，亦可提升轉向靈活性，令用家以更靈活嘅轉向與變速動作。

Ace15 全場我話事

X15以Chaos為設計主導思想，另一邊廂嘅Ace15就反其道而行，強調「Control」，要令成場波都喺掌握之中，邊類型嘅用家有咁大想頭？就係鍾意用控球、傳送嚟決定攻守節奏以至用波方向，作為全隊大腦嘅領袖級球員；身為樞紐，攻或守都要由佢拍板，尤其是進攻時候，長傳急攻或短傳滲入、高波或地波、左中右三路由哪方突入，可想而知唔止掂波次數多，控或傳都要分外精準，否則一子錯滿盤皆落索。為此Ace15嘅最大特色，就係由鞋頭到鞋身中段都鋪上Control Web網紋結構，利用3D物料結合具黏性嘅EVA製成，表面再加上呈微細圓點狀嘅NSG（Non-stop grip），藉此加強鞋面與足球表面嘅摩擦作用，從而提高控球準確度，無論盤、傳、射都更見精準，讓用家的每一腳都可主導球賽進程，adidas甚至期望Ace15的用家，可以發揮出「Coaches plan into action」的關鍵性作用，成為球隊大腦。除此之外，身為球隊司令官，自然往往係對手嘅打擊對象，故此呢類派牌型球員往往都要有出色嘅「搓波」技術，好好保護皮球以防被對手偷走，Ace15嘅鞋釘數目就明顯偏多，就連鞋底中央都滿布細釘，藉此加強「搓波」能力。

Messi15 球王專享

作為三間牌嘅頭號球星，美斯嘅待遇自然非同凡響，故此喺今次嘅波Boot革命之中，品牌特意為美斯開發出專屬嘅Messi15。美斯出名扭得，逢人過人，Messi嘅鞋身前半段用咗新物料MessiTOUCH，具有穩定、貼腳嘅優點外，細心的話仲會睇到看似平滑嘅表面，其實滿布微細凹痕，加上質地柔軟，可以加強控球能力。至於鞋身後段嘅MessiFRAME，支架形結構就似籃球鞋常用嘅支撐裝置，顯而易見為咗加強鞋尾對腳踭嘅支撐表現所致。鞋底亦係全新設計，用上MessiPRINT及MessiGAMETRAX嘅外底與鞋釘混合式布局，可以提升速度上嘅爆炸力，令美斯嘅高度突入變得更屈機。其實唔只美斯，眼利嘅球迷應該發現，香港隊嘅右閘盧均宜喺最近兩場世界盃外圍賽上，都係着Messi15上陣，成條右路一夫當關快上快落，仲頻頻交出進攻，Messi15喺速度上嘅優勢顯而易見。

查詢︰2730 0157（尖沙咀漢口道adidas旗艦店）、2317 1686（旺角朗豪坊7樓Futbol Trend）、2789 8198（旺角豉油街adidas Mega Store）

有些機會只屬於後生仔的

早前已經報道過，adidas喺德國柏林Set Up咗首個市區足球中心The BASE，場地設施令香港波牛葡萄得很，三間牌仲藉此推廣一種全新嘅比賽模式——2V2 #BeTheDifference，人少少，湊齊四個人「2打2」就玩得，而且講求創意，香港又有冇得玩先？無論你係「大埔美斯」、「觀塘蘇亞雷斯」定係「灣仔洛賓」都好，總之全港18區自認好波之人都要留意，2V2 #BeTheDifference足球比賽將會移師香港舉行，仲已經接受報名！特色在於勝負唔只由入球數目決定，仲會計埋入球、運球時嘅花式動作，難度愈大評分愈高，除咗放膽使出施丹轉身、通坑渠以至窩利抽射等招式外，更加鼓勵參加者自創花式動作，啱晒鍾意Show Off嘅球迷。

2V2 #BeTheDifference嘅比賽日期為7月2日至4日，地點就係中環海濱嘅adidas Sports Base，現已接受網上報名，取錄形式先到先得，名額16隊，每隊最多可報三位球員，截止報名日期為本月20日，取錄結果將於本月27日或以前以電郵通知。不過睇清楚「比賽組別及名額」嘅要求，原來只接受「男子18歲或以下組別（所有隊員需於1997年或以後出生）」參加，唔只筆者超齡冇得玩，就連女仔都冇份玩，只好嘆句︰「有些機會不屬於我的……」如果你合資格嘅話，就唔好錯過了！

網址︰http://adidas.digitalcampaignasia.com/bys/2v2challenge

查詢︰2149 3844

627 J.Lin訪港預告

今年暑假，中環唔只有荔園，仲有運動基地adidas Sports Base！為期約六個禮拜內，adidas Sports Base將會舉行一連串運動項目，足球、籃球、瑜伽、體能訓練與跑步等兼而有之，除咗上文提及嘅2V2 #BeTheDifference，大會預告仲有adidas Streetball Academy 2015籃球訓練班、#mygirls Yoga Class女子瑜伽、adidas Circuit Training男生循環訓練，以及#mygirls Urban Run、Boost Central和Run Around HKI等跑步項目，相信大家總會搵到自己那杯茶，度過一個揮汗最多、正能量最旺盛嘅夏天。為咗加強號召力，J.Lin林書豪將於本月27日抵港，並於27及28日駕臨adidas Sports Base試玩唔同項目，進行為期兩日嘅運動真人騷，想近距離一睹佢嘅風采，就要密切留意adidas稍後公布嘅消息了。