MG Gundam Double X 月下雙響炮
回想90年代末嘅高達TV作品，故事試過唔少新方向，希望吸納新一輩嘅動畫迷，例如用拳頭代替核彈頭嘅《G機動武鬥傳》、大玩SMAP美少年組合元素嘅《新機動戰記Gundam W》，以及唔再Sell新類型人嘅《機動新世紀Gundam X》，前兩套獲得空前成功，後者卻腰斬收場，無他嘅，高達世界一向標誌嘅賣點一下子冇晒，角色設計變到唔突出、劇情又薄弱，就連MS賣相都……仲以為「X」系列嘅機設會成為黑歷史，點知19年後嘅MG模型嚟個大平反，繼之前嘅X Gundam成功翻新之後，接棒而嚟嘅Gundam Double X會唔會再有驚喜？
綠色胸甲透明度高，可以清晰見到內部嘅機械細節。
Defense Plate嘅紅白色位置用分件處理，突出層次感。
六塊Super MicroWave嘅底層，都貼咗折射度高嘅金色卡紙。
拉長炮身，再將藏於肩甲之間嘅瞄準器拉出嚟，並與炮身連接，就完成雙炮變形過程。
前臂及小腿嘅原色散熱片，顏色上「膠」味太重，一向「素組」嘅筆者都忍唔住，自行用金色噴漆Repaint。
兩邊腰間都有Hyper Beam Sword劍柄，係Gundam Double X最強嘅近身用武器。
唔用地台嘅話，就連企定定甫士都利用炮身當腳架先至企得穩。
MG Gundam X嘅設計，唔只賣相比原裝機設修長咗，外形上仲追加咗好多Detail位，加上出色嘅可動性，令人眼前一亮，今次嘅MG Gundam Double X又如何？首先，呢兩部MS其實係完全截然不同嘅型號，造型各異，但係化身MG模型版本，竟然骨架結構完全相同，只係外觀裝甲唔同咗，最Eye Catching係心口兩塊透明綠色胸甲，做到晶瑩剔透，喺原著故事中，呢個位置係用嚟吸收月面基地「D.O.M.E.」嘅衞星微波。
骨架好扭 可惜冇腰骨
骨架一雞兩味，果然貫徹B記「善用資源」嘅傳統，慳番唔少鑄模成本，如果你都砌過之前嘅MG Gundam X，難免會覺得悶，不過正如上文所講，呢副骨架又的確幾好扭，可以擺到大幅度嘅持槍、拔劍等招牌甫士，咁講法，擺雙炮甫士都應該Easy Job啦；MG Gundam X只有一支Satellite Cannon，撐得住，但係MG Gundam Double X打孖上，腰位Ball Joint變得唔夠力承托，令成個上半身向晒後傾，就算收起雙炮，只係擺簡簡單單嘅企定定甫士，都因為背部組件太累贅嘅關係，要用炮身當腳架先撐得住，故此奉勸各位有意入貨嘅爸打，砌好之後想有型有款Display出嚟，就要額外花錢買個地台，唔慳得。
重鑄雙炮 變形過程做到足
Gundam Double X嘅最強武器就係Twin Satellite Cannon，威力達到地圖炮級數，為咗傳神重現，MG版本炮身嘅變形機關上落足心機，首先從前臂及小腿裝甲拉出金色散熱片，跟住張開背包兩側合共六塊嘅Super MicroWave，之後將炮身轉到膊頭，同步拉出藏於肩甲之內嘅瞄準器，同拉長咗炮身結合，就可變成雙炮發射模式，成個程序夠晒仔細，連接結構亦算穩陣，總算爭番唔少印象分。
唔只有Twin Satellite Cannon，Gundam Double X周身刀張張利，MG模型亦都一一跟足，例如近身用嘅Hyper Beam Sword，拔劍位置從Gundam X嘅背包移到腰間，射擊武器亦都升級為Buster Rifle，至於Gundam X都冇嘅盾牌，今次就有Defense Plate，抵讚之處係盾內設有活動臂，當前臂展開散熱片時，就可以透過活動臂嚟就位，唔會互相頂住。如果B記日後可以加堆埋MG G-Falcon，跟足動畫機設咁樣與Gundam Double X合體，咁就功德圓滿了！
查詢：2433 1828（瑞華行）
