嚴選VoIP Apps 話音通全球

邊隻易操作？

想經Facebook通話，就要齊齊安裝《Facebook Messenger》；如果對方已經安裝咗，App內Profile Picture右下角就會出現藍色Messenger圖示，否則就會出現灰色「f」 圖示，致電對方都唔會有反應。操作方面，介面右上角設有獨立通話鍵，對方毋須長開FB或者《Facebook Messenger》，一有來電依然會有響機提示。另一邊廂，以對講機功能起家嘅《WeChat》，內地用家就比較常用，只要雙方都安裝程式，就已經可以用到語音通話功能；揀選朋友之後，需要類似傳送相片般按右下角「+」號，再按「語音通話」一項先得，比其他Apps多一重步驟。

全球用家超多嘅《WhatsApp》最近先加入語音通話功能，用家只要進入對話視窗，即會發現頂欄有個通話符號，Android版本更為通話另闢一欄，通話記錄更加清晰。值得一提，WhatsApp預設通話功能會強制由WhatsApp語音通話撥出，如果想用番傳統方法致電，需要經電話簿或手機電話介面，稍為不便。至於歷史最悠久嘅《Skype》，玩VoIP已經超過十年，揀啱朋友，按下方通話鍵就得；唯一不便就係需要通話雙方都同時長開Apps於上線狀態，先可以成功致電。

邊隻至慳流量？

至於流量方面，撥號及接聽都用4G網絡，以通話兩分鐘嚟計的話，《Facebook Messenger》錄得898KB，《Skype》消耗1MB，《WeChat》則用上971KB，三者數據流量相若；而《WhatsApp》所用嘅數量僅得387KB，為四Apps之中最少，數據流量有限嘅用家就最啱用，而且App內已提供網絡使用流量作參考，非常貼心。其他功能方面，《Skype》同《WeChat》都有推出桌面版本；而《Facebook Messenger》及《WhatsApp》更提供網頁版，前者可照樣使用語音通話，但後者網頁版僅兼容訊息而不支援語音通話，相對輸蝕。不能不提，《Skype》可以買點數以Apps致電傳統電話號碼，又或者月租一個與傳統電話號碼一樣嘅Skype號碼，方便聯絡，甚至作飛線之用，啱晒商務人士。

結果：《WhatsApp》Win

邊隻通話質素佳？

想取代傳統電話，通話質素當然係最重要。今次四款Apps都係要喺Wi-Fi或者數據網絡下使用，Wi-Fi訊號嘅速度向來較穩定，反而數據網絡會因應地區、位置而有所影響。小記分別以4G及3G網絡下測試通話，用《Facebook Messenger》通話間中有微窒，人聲亦未夠清晰，不過整體順暢。《WeChat》通話都見流暢，不過背景雜音較多，而且音量稍為偏低，需要將音量調校至最高方聽得清晰。《WhatsApp》通話音量適中，但背景雜音明顯較大，而且通話時有出現延緩，人聲更有回音。而《Skype》人聲清晰度、背景雜音等表現都不俗，不過就最受網絡質素影響，訊號不穩定時，通話質素就會嚴重打折扣。

結果：《Skype》Win

達人點睇？：香港資訊科技商會榮譽會長　方保僑

「我最常使用就係《Skype》，因為功能較其他Apps齊全，而且可租用號碼，一到外地就將香港號碼飛線至該號碼，令通話費用即時大減。通話質素當然不及傳統電話，但現時數據網絡愈趨穩定，身處網絡發達嘅日本、南韓固然順暢，早前於北京用VoIP通話效果亦很好。」

攝影達人　Will Cho

「較多用《WhatsApp》同《Facebook Messenger》，通話質素同傳統電話相差唔大，不過對於通話雙方嘅網絡要求比較高，有時外遊，身處山區、離島或者網絡無咁發達嘅地方，好似老撾、尼泊爾，通話嗰陣有時會斷線，亦可能會延遲數秒。自從《WhatsApp》出咗語音通話之後，就用多咗好多，始終同香港嘅朋友平時多數用佢嚟聯絡。」