今夏我至Sharp adidas Energy Boost Reveal
夏天，唔只為大地帶嚟雨水及美腿，仲有潮鞋！無論係絲打們嘅「筷子腿」或者「蜜大腿」，又或者爸打們粗壯嘅飛毛腿，幾有自信都好，總唔能夠赤腳逛街啩；雖然話今年白鞋當道，但係人人都跟風，幾In嘅潮流都會變得庸俗吧！夏天應該係一年四季最有活力、最Colourful嘅日子，adidas Energy Boost今期就新增艷色版本，青、橙、黃和粉紅四色紛陳，而且鞋面用料亦有改動，變得更易Carry襯衫出街，食正今年時裝界嘅運動風。
Energy Boost Reveal $1,299 /對
鞋底以Torsion System連結前後掌，發揮穩定作用。
出於耐磨需要，外底嘅主要觸地位置都用咗adiwear物料。
鞋面顏色變得Colourful之餘，用料亦變成針織款嘅網布物料，比起ESM更易襯衫。
鞋舌以至鞋尾嘅三間商標，都用咗反光物料。
鞋身兩側嘅三間商標，唔只裝飾咁簡單，事關用咗韌度高嘅TPU製成，發揮鎖定腳掌嘅效果。
Energy Boost（左）與Rocket Boost都用咗厚厚嘅Boost中底，不過出於加強穩定性需要，Energy Boost嘅Boost與鞋籠之間加咗一層EVA，而Torsion System組件亦延伸至後尾內側。
CC Rocket Boost（W）$1,099
CC Rocket Boost（M）$1,099
雖然鞋身前、中、後都以不同物料製成，但同樣滿布氣孔，帶嚟全方位透氣能力。
鞋底中央嘅透氣槽，與鞋墊中央嘅氣孔相連，將腳底嘅汗氣直接排走。
鞋領內側與鞋舌背後都有墊位，貼腳之餘都唔會構成過分壓力。
對於Fashion，筆者自問識條鐵咩，不過今期大吹運動風就係鐵一般嘅事實，平時只係跑步、Training，甚至球類運動所着嘅衫褲鞋襪，依家都可以Mix & Match，變成至潮至In嘅Casual Wear，呢個新方向，除了出於時裝界嘅大力鼓吹，各大運動品牌嘅相應配合亦都功不可沒，喺產品設計上唔再單一追求功能化，仲要追求時尚化。
時尚功能集於一身
與Ultra Boost一樣，同屬三間牌旗艦級跑鞋系列嘅Energy Boost，早前已經推出咗Energy Boost ESM，鞋面用上機能網布加Techfit，集支撐、透氣與輕量化等功能特點於一身，至於最近上架嘅Energy Boost Reveal，鞋面改用類似Primeknit嘅網布物料，針織外觀唔似ESM咁重Sporty Look，反而多咗幾分便服鞋嘅感覺。至於最Eye Catching嘅地方，係鮮艷嘅單色設計，男裝有青色及橙色；而女裝就有黃色及粉紅色，襯晒夏日應有嘅佻脫氣氛。
雖然話Energy Boost Reveal變得Fashion化，不過功能設計依然係旗艦級標準，包括接近全掌式嘅Boost中底，帶嚟高度嘅緩震與回彈作用；鞋底中間以Torsion System接結前、後掌，藉加強穩定作用減少足踝扭傷嘅機會；鞋身兩側嘅三間商標以TPU物料製成，可以牢牢地穩定腳掌，防止出現過分滑移。至於網布鞋面嘅輕量化、透氣與貼腳程度，其實與ESM相差無幾，所以同出一系嘅Reveal，既係時裝界運動風嘅最In配搭，亦都未忘初衷，依然係練跑時嘅好拍檔。
Rocket Boost全方位透氣
Energy Boost Reveal功能與時尚氣息兼備，至於同步上架嘅Rocket Boost，就更加傾向Casual Wear類別，而且係專為夏日而設。Rocket Boost唔只有厚厚嘅Boost中底，而且係全掌式設計，而Boost直接與鞋籠相連，兩者之間並冇任何物料相隔，故此可以帶嚟全面、直接嘅緩震作用，用嚟練跑或者會稍嫌支撐度不足，但係日常逛街就夠用有餘，加上鞋側內側以及鞋舌背後都設有墊位，舒適性難以挑剔。更重要嘅特色係整個鞋面都有氣孔，而且係「疏窿」設計，就連鞋底與鞋墊中央都設有相連式嘅氣孔，連鞋底都可以排汗透氣，又有幾多鞋款做得到？今年夏天再熱、再潮濕，雙腳都唔使再受罪啦！
查詢︰2730 0157（尖沙咀漢口道adidas旗艦店）、2789 8198（旺角豉油街adidas Megastore）
