早前在櫃桶暗角找回一盒母親在我五歲半時偷錄的聲音片段，內容其實都幾搞笑！一個非常煩惱的細路不斷說：「先生話嘅……」所講的東西不是被雷電劈死，就係意外死！慶幸我生在一個非主流傳統家庭，否則已被家人打死！

回想自己在童年時，都幾非一般小童，不斷問各種各樣的問題，而且是必定要家人答到為止！若他們不肯作答，我就表示電視都教人「每事問」喎！因為無綫那時在周末有個節目叫《每事問》，而且會唱主題曲：「若要攞高分，天天每事問……你每事問會有好學問，經驗累積可辨別假與真……」原來到依家仲記得首歌。有網友問我，雲海小時候真是好聽先生話呢？當然不是！仲記得在幼稚園時，一個女教師頂唔順我在堂上不斷同同學講嘢，捉了我入一間小小的黑房好一陣子，要嚇我！最慘係我唔怕黑！在小學時，有次因為一位女教師公然在堂上笑另一位同學的花名，我在班上大叫一聲：「無恥！」竟被她罰企！有冇搞錯？你笑學生花名就得，我話你無恥就唔得！還有也是在小學時，我最喜歡捉不同類型蜘蛛入小藥樽中飼養！有一次，我把那一樽寵物放在褲袋帶回校，剛好那天要搜書包，老師搜到那樽蜘蛛，又罰我企！喂！校規邊一條有話唔准學生帶蜘蛛返學？但個老師好嘢，佢話我試圖或企圖帶蜘蛛回校嚇老師！又係要罰企，鬼知你班小學先生咁細膽咩？

仲有一次學校旅行因打風取消，但大家已回到學校，於是我問：「打風可唔可以留喺學校野餐？」問准後連同幾個同學，在小學校園運動場的大樹下野餐，又吃又傾偈，一個早上非常快樂！這個小學生真係好煩！