國產平板雙OS加持

想平平哋買部平板電腦，行轉腦場就大把國產選擇，雖然花多眼亂，但不時都有既實用又叫人有驚喜的功能，而最近就興玩Windows加Android雙OS切換，前者做文書處理，後者用來睇片聽歌。筆者搜羅了兩款各具賣點的雙OS附身國產平板，同場仲有部行雙OS的TV Box呢！

$1,699（a）

鍵盤套背部摺起即成支架，而鍵盤回彈力也不俗。

黑色鋼琴鏡面機背相當高貴搶眼，上下仲有金屬包邊。

端子在機身左側，當中雙USB 2.0特地夾着microUSB插口，以免插頭互頂。

在Android介面（左）時，於右上方拉下菜單；Windows介面（右）時，則於桌面點擊轉換Icon，即可一按切換OS。

$1,899（b）

切換OS係靠開機時預設，萬一揀錯了就要關機重新選擇。

底部有一排虛擬鍵，可直接擷圖及控制音量。

用Retina屏幕看南韓女團MV，可見膚色飽和自然。

$1,199（c）

機背有microUSB埠，而microSD讀卡器可支援64GB卡款。

梯形機身側面比上代多出兩個USB插口。

Chuwi Vi10 一按切換

所謂一按切換OS，並非指機身有粒實體鍵，而是透過桌面Shortcut及菜單選項來讓平板轉換平台。Chuwi（馳為）Vi10這款有個10.6吋芒的平板就是如此，外觀設計亦算型仔，機背係鋼琴鏡面，機身上下兩條邊框有金屬包覆，山寨味不濃。而機身左側的擴充端子擺位清晰，當中雙USB 2.0夾着microUSB插口，同時使用USB都不怕插頭互相頂住晒，設計貼心。最正的是Vi10學足Surface 3般，配有磁性結合點，讓你可以輕鬆結合鍵盤保護套；鍵盤本身一插即用，配對快捷，摺疊起來即可當成支撐架。令人滿意的是實體鍵帽回彈力不俗，又支援喚醒功能，打開機套後平板便自動從Sleep Mode醒來。

SPEC

處理器：Intel Atom Z3736F

記憶體：2GB RAM、32GB eMMC

屏幕：10.6吋IPS（1,366×768）

系統：Windows 8.1及Android 4.4

鏡頭：前置200萬像素、後置200萬像素

體積：278×171×8.8mm

重量：523.5g

Teclast X98 Air 3G Retina靚芒

這款Teclast（台電）X98 Air 3G平板走簡約路線，其銀色金屬機背加上雪白邊框，拎上手驟眼睇，仲以為是iPad來的，不過其正面沒有Home鍵，而且前置鏡頭擺位偏左。此平板賣點在於配備2,048×1,536解像度的Retina顯示屏，色彩特別鮮艷，飽和度高，睇片冇得頂。另外Android介面也有所調整，例如Apps的排列方式係模仿iOS，另外底部設有一排虛擬鍵，用作擷圖及控制音量；而在Android狀態下，仲支援3G通話呢！有辣有唔辣，此平板轉OS方法比較麻煩，就是靠開機的首10秒揀選，按錯了就要熄機重開，有點費時失事。

SPEC

處理器：Intel Bay Trail-T 64 bit

記憶體：2GB RAM、32GB eMMC

屏幕：9.7吋IPS（2,048×1,536）

系統：Windows 8.1或Android 4.4

體積：240×169×7.4mm

重量：498g

同場加映

PiPO X8 觸控盒子

話說國產雙OS設計係由TV Box帶起，而當時代表作PiPO X7就令一眾腦友記趨之若鶩。沒想到後繼機X8索性加埋塊7吋觸控屏幕上去，雖然解像度僅1,024×600，直接用來煲劇畫質當然是「有限公司」，但勝在切換系統時毋須預先駁落顯示器，直接在平板上操作便可，相當方便。為符合人體工學，產品特別採用梯形斜向設計，兩側有喇叭；而擴充端子數目比前作多，機側多出兩個USB外，機背另增設一個microUSB及microSD讀卡器，插卡播片就最適合不過。預載Apps方面，就有齊中港熱門視訊軟件。