平民S Pen 插畫師實試︰「似真筆」

S Pen向來係Samsung Galaxy王牌配備，以往一直只出現於Note 4或Note 10.1等頂級產品上，某程度可說是身份象徵。不過，近來廠方有意把S Pen普及化，首度把此筆移植到入門平板Galaxy Tab A身上，但究竟價錢平咗，效能有無差異呢？今次一於請來80後插畫家Angryangry，幫我哋詳細測試一番！

Angryangry畫風細緻，透過Tab A就能充分發揮；Tab A幾有金屬感，並配備8吋XGA屏幕。 $2,298（Wi-Fi版）、$2,898（LTE版）

Angryangry讚S Pen夠輕，靈敏度高，很方便畫師一機走天涯。

LTE版支援4G SIM卡，並兼容中港制式。

設有外置喇叭，聲音好出，可惜得一邊有，難免偏聲。

銀灰色機背配備500萬像素鏡頭，但補光燈就抽走咗。

S Note提供不同筆頭、顏色及粗幼選擇，功能齊備。

《AnTuTu》得20,014分，性能跟紅米2相若。

屏幕提供最佳化及閱讀兩個模式，飽和度及清晰度會自動調校。

支援圖像剪貼功能，可以把想要的畫面圈出來再拼貼埋一齊。

機身相當輕

近年各大廠商對平板市場放慢晒手腳，偏偏Samsung沒有停步，全新Tab A沿用一貫銀灰色直板造型，驟眼看金屬感頗強，點知原來只是普通膠殼，拎上手係無咁紮實，但就換來僅僅334g嘅重量，Angryangry拿上手就謂︰「部機夠輕身，單手揸都唔攰，而且攜帶方便，好啱我隨街畫畫用。」Tab A提供8吋及9.7吋兩款型號，解像度同為1,024×768，符合4:3比例，睇書畫畫比例剛剛好，睇片上網問題亦唔大，只是放大時難免有微粒，睇慣高清芒嘅奄尖用家或會投訴。

畫出細緻畫風

說到S Pen，今次筆身打橫插於平板上方，跟以往垂直插於機身下，使用時要就手得多。觸感方面，即席叫Angryangry試畫再品評，佢話︰「支筆夠輕，用起來手腕冇咁攰，壓落去亦感受到粗幼，唔使經常換筆就畫到唔同線條嘅公仔，敏感度做得唔錯，有真筆感覺。不過筆嘴同屏幕間有距離，所以落筆總有少許移位，仲有改善空間。」小記從旁觀察，佢用Tab A都畫到擅長嘅細緻畫風，證明S Pen沒有將價就貨而變得遲鈍，而且Tab A仲有埋「Action Memo」、「擷圖編寫」及「圖像剪貼」等功能，唔畫畫用來Jot Note都得。

支援中港4G

S Pen保持高水準，但其他方面總要犧牲，好似處理器就採用入門級的Snapdragon 410，僅有2GB RAM，儲存空間也只有16GB，因此跑分只跟紅米2相若。幸好系統已「升呢」到Android 5.0，操作尚算流暢，也免卻日後手動升級之苦。Tab A另一賣點係備有Wi-Fi及LTE兩個版本，當中後者兼容中港兩地3G與4G網絡，很適合經常飛嘅生意人使用；唯一可惜係無雙卡設計，過關時要自行換SIM卡就唔夠方便。