ZTE Blade S6 Plus　手提遙控王

屋企總有十件、八件家電，每樣都有個遙控，既麻煩又易整唔見！ZTE新推出嘅Blade S6 Plus手機就啱場合，佢具備中階手機少見嘅遙控功能，可以透過機頂紅外線，遙控一系列電器，一機搞掂晒。

$2,299
《遙控助手》預設多款電器型號，大路牌子都有齊。

暫時只得銀色一款，塑膠物料，手感一般。

預載Android 5.0作業系統以及自家MiFavor 3.0 UI，操作順暢。

內置多個拍攝模式，包括全景、美膚、移除背景等等，功能拍得住高階機。

搭載Snapdragon 615處理器及2GB RAM，跑分接近三萬，以中階機而言算合格，效能夠撐。

備有《AliveShare》，毋須上網都可以聯繫其他用家，互傳文字、遊戲對戰都得。

採用傳統輕觸式按鍵，反應都算靈敏。

支援雙卡雙待，其中SIM 1兼容2G、3G及4G制式，而SIM 2僅兼容2G。

Blade S6 Plus係Blade S6嘅加料版，圓角銀色機身、圓角輕觸功能鍵、7mm厚度都同上代一樣，不過屏幕就由5吋加大至5.5吋，另外亦由上代嘅一體式機身改為可拆殼設計，拆開機背殼就可以換SIM卡、記憶卡，相當方便。至於電池就冇得換，但容量加碼，由上代2,400mAh增至3,000mAh，理論上續航力耐啲！Blade S6 Plus有500萬像素前置以及1,300萬像素後置鏡頭，規格與Blade S6相同，但就升級用雙色LED，光猛得來色溫又準，夜拍幫到手。

支援多種電器

硬件配置其實與上代相差無幾，包括用Qualcomm Snapdragon 615八核心處理器、2GB RAM，支援4G制式、雙卡雙待，以中價機而言功能相當齊全。最可惜係捨棄上代嘅體感操控，但另一邊廂又新增咗遙控器功能；Blade S6 Plus機頂設有中階機少見嘅紅外線連接，配合內置嘅《遙控助手》App，就可以學習各款遙控嘅功能，好似開關、轉台等等；佢支援電器種類超多，包括電視機、冷氣機，甚至近年好Hit嘅盒子都對應得到，隨時變身萬用遙控器。