Hybrid有得諗　Toyota Prius C

近期有唔少朋友都想買車，不過計到油費開支就皺晒眉；想慳油錢，唔一定要揸電動車（分分鐘車價都抵唔番條數），Hybrid其實亦有得諗！筆者早前就同豐田（Toyota）Prius C做咗三日兩夜嘅長測，開行冷氣駛過大埔、沙田、深水埗等地，行程合共約200km，借車時得六格油（滿油為10格），還車時仲有四格油剩，你話夠慳未？每個月慳到嘅油錢，用嚟做轉Facial都好吖！

車廂布局簡約有序，奉行實用為先嘅路線。

電子控制無段變速波箱，轉檔反應暢順，新牌仔都易Handle。

手掣前方設有節能（ECO）及純電驅動（EV）駕駛模式按鍵，轉Mode話咁易。

1.5L直四引擎加上電動馬達，總馬力可達101ps。

後排空間中規中距，多得有平地台設計，都未算頂頭頂腳。

油電系統嘅運作狀況，中控台嘅3.5"屏幕上Show得一清二楚。

皮革軚環附設有觸控追蹤顯示嘅多功能按鍵，手不離軚都可操控音響、冷氣及資訊系統。

正如主流揭背車，Prius C都可以收起後排，增加車尾置物量。

廠方公布嘅平均耗油量為34.5km/L，就算打個75折都行到26.1km/L，油費唔使$0.6/km。

Prius C嘅動力來自由1.5L NA引擎及電動馬達合組而成嘅油電混合動力系統，先講引擎嗰Part，規格係1.5L VVT-i，擁馬力73ps、扭力11.3kgm，至於同步交流電動馬達（恒久磁石），另有61ps馬力及17.2kgm扭力，兩者同時發功，最大馬力就去到101ps，配合電子控制無段變速波箱，轉波有力又夠順。同一般嘅日系1,500c.c.車款相比，Prius C無論喺着車或者行車都靜得多，至於整體嘅動力輸出亦屬合理水平，喺香港絕對已經夠用。

自動儲電功能

Prius C嘅起步靠電力驅動馬達，鬆迫力輕吊油門已經應付到，做到零耗油、零排放。筆者喺深水埗北河街低速行駛時，試過輕輕吊住油門，就會自動轉由馬達驅動，毋須耗油；至於加速表現，例如喺吐露港公路切線爬頭，只要踩深少少油門，馬達與引擎就會齊齊發功，話去就去，更重要係電池毋須靠外界充電，主要靠每次減速時，馬達會變成發電機供電幫助減速，並將車輪嘅動能轉變成電能，儲存於電池內；若果電池嘅儲電量不足，馬達就會充當發電機，自動發電再儲入電池，毋須擔心冇電行唔郁。

貼心花粉過濾

為咗令駕駛者清楚知道油電混合動力系統嘅運作情況，中控台頂層就有即時駕駛監察系統屏幕，用圖像、箭嘴顯示出嚟，清晰易讀，幾時由馬達驅動電池供電、幾時又改由引擎同馬達同步發功，以至幾時將車輪動能轉變為電能儲存於電池內，駕駛者都一清二楚。此外，車上配備大面板屏幕嘅音響系統，並有藍芽接駁及USB連接埠，可以連接智能手機或平板電腦，個人Play List話播就播。筆者最愛係附設花粉過濾器嘅冷氣系統，有助保持車廂空氣清新，有鼻敏感嘅筆者自然感動啦！