S6 Edge vs G Flex 2 決戰在彎

近年南韓手機喺創意方面真係要畀個Like，年初LG就有部彎芒G Flex 2，而最近返晒行貨嘅Samsung Galaxy S6 Edge亦無獨有偶以彎芒作賣點。達人G估計好多人對上述兩部手機有好感，究竟邊部值得入手？達人G兩部都喺手，即刻出個報告先！

Samsung Galaxy S6 Edge

LG G Flex 2

捽一捽S6 Edge邊位，側屏幕就會顯示時間及新聞等內容。

People Egde介面可以喺主頁右邊拉出嚟，能夠加入五個聯絡人，方便快速撥號，並以顏色區分各人嘅未接來電或訊息，尚算清晰。

G Flex 2支援Glance view功能，待機下由屏幕頂拉落底即可睇到時間等資料，唔使次次開着手機屏幕。

G Flex 2機身上下微彎，手工比上代更加好。

S6 Edge邊位有輕微反光，影響觀感。

G Flex 2包圍感相當唔錯，如果有埋2K芒就完美。

S6 Edge拍攝功能都算齊備，而且有專業模式畀你自行調校設定。

G Flex 2拍攝介面相對簡單，玩味亦相對稍遜。

第1回合：曲芒鬥實用

兩款手機屏幕嘅彎曲方向各異，S6 Edge屏幕左右兩邊微微向下彎，廠方就叫呢個做側屏幕，當熄芒待機時，只要喺側屏幕捽兩捽，就可以顯示時間、通知、新聞等資訊；而且仲引入全新People Edge功能，可以喺側屏幕位置加入五位常用聯絡人，方便極速打電話、傳SMS；不過因為備有側屏幕，邊位較平常手機薄，加上採用金屬邊框，摸落有少少刮手，相信用機套會好啲。而G Flex 2就繼承上代G Flex由上而下嘅曲芒設計，雖然曲芒冇專屬新功能，但傾電話超貼面，擺後褲袋亦都好貼服；今代屏幕改用強化玻璃，比上代膠面更清晰，但就冇上代咁好彈性。

第2回合：比睇片效果

依家係人都用手機睇片，S6 Edge同G Flex 2分別配備5.1吋及5.5吋屏幕，喺呢個Phablet橫行嘅年代都算係細芒一族。S6 Edge屏幕解像度達2,560×1,440，唔單止畫面細緻，而且Super AMOLED屏幕顏色仲夠晒Sharp；不過側屏幕嘅弧位就令反光位特別明顯，稍為妨礙顯示效果。而G Flex 2就由上代嘅720p解像度升級至全高清，最重要係屏幕半徑曲線弧度達到650mm，原理正正同曲面電視機一樣，着重提升包圍感同埋臨場感，效果超正。

第3回合：試影相功能

S6 Edge備有1,600萬像素、F1.9大光圈主鏡頭；G Flex 2主鏡頭有1,300萬像素，以及有雷射自動對焦功能；兩者都具備OIS光學防手震技術，睇規格真係唔錯。達人G於日光下試拍，發現兩機對焦速度同成像質素都好接近，咁就不如摷下有咩實用模式好過。S6 Edge有專業、慢動作、快動作、虛擬拍攝等模式，而且仲可以玩後製，為人像玩柔肌、瘦臉、大眼等；相反G Flex 2就僅得超廣角、前後鏡齊拍等大路模式，後製功能亦只係玩吓濾鏡、調校飽和度等。要齊齊讚嘅係，兩機都支援快速啟動相機，前者連按兩吓Home鍵就得，後者長按「音量-」兩秒亦得，影Snapshots一流。

達人G結論：一部破格、一部穩陣

S6 Edge雙邊側屏設計確係破格，如果日後再追加多幾個方便功能就更佳，否則部分用家可能會揀冇曲芒兼機價平啲嘅Galaxy S6；而且今次廠方仲放棄咗沿用多年嘅可換電、插記憶卡嘅設計，對於講求擴充嘅用家未必啱使。而G Flex 2功能贏在四平八穩，將一系列G3招牌式、受歡迎嘅「分唇」一次過移植，加上曲芒呢個Gimmick，應該吸納到講實用又想有啲新鮮感嘅用家；達人G反而覺得佢個自我修復塗層嘅機背好實用，因為唔怕刮花，機套都可以慳番！