實試堅好玩 Honda Jazz 1.5 RS

換晒成套RS Aero Body Package運動化擾流嘅本田（Honda）Jazz 1.5 RS，形象動感化，與平實、大眾化嘅主流Hatchback對手相比，自然Eye Catching得多，而且性能表現令人雀躍，1.5L引擎配七前速CVT波箱，132hp馬力結合加減波，好玩指數令人期待。筆者早前拍住Jazz 1.5 RS，試足四日三夜，親身驗證呢部新車到底好唔好玩。

Honda Jazz 1.5 RS

高置式尾翼內藏煞車燈，型格與實用兼備。

翻平後排椅背，就可同車尾打通，變成置物大平台。

後排椅墊可以向上摺起，變成另一種置物空間。

軸距長達2,530mm，後排腳位自然有交代。

面對突然加速需要，引擎與波箱都夠晒合拍，就連上長命斜都可以輕鬆過關，抵Like！

三幅式多功能軚環設有功能鍵，手不離軚都可操作音響及定速巡航。

6.1"輕觸式LCD屏幕對應音響、藍芽及倒車鏡頭，一物多用。

冷氣控制介面採用平面輕觸式設計，夠In！

金屬腳踏屬於RS嘅標準裝備，比起1.3L版本更見跑味。

按鍵即可啟動引擎，毋須插匙，方便得很。

全車換晒RS Aero Body Package嘅頭尾泵把、側裙及尾翼，型盡每個部分。

RS副偈並非主流Jazz嘅1.3L引擎，而係性能更高嘅1.5L DOHC i-VTEC自然吸氣引擎，雖然冇Supercharged、冇Turbo，不過有直噴技術，令馬力與扭力分別谷到132ps與15.8kgm，以同級引擎嚟講，表現超晒班，尤其係加速方面，車仔細細但絕對唔好恰，每當停車起步，或者突然加速，引擎與波箱反應都合拍到極，即時有反應，筆者就試過經城隧往返荃灣，雖然隧道口有長命斜，當時全車又滿載五個人，兼且開行冷氣，不過部車依然有心有力，話上就上，表現完全超越一般嘅1.5L NA車仔。另一方面，七前速CVT自動波又對應軚環撥片加減波功能，唔只上落長命斜都可以藉降低波檔嚟協調車速表現，攻彎更加大派用場，令出入彎角更見流暢，一字記之曰︰爽！

好動本性盡形於外

其實RS嘅動感本色，早就盡形於外，由頭尾泵把、側裙及尾翼，都換上RS Aero Body Package，重甲上身戰意昂揚。車廂方面亦有相應配套，包括紅色暗紋座椅、碳纖裝飾與金屬腳踏等，都已列為標準裝備，至於藍芽系統、對應倒車鏡頭嘅6.1"輕觸式LCD屏幕，以及平面輕觸式設計嘅冷氣控制介面，都見出Jazz 1.5 RS夠晒User Friendly。咁齊料，但係車價不足$200,000，夫復何求？

空間足可調配座椅

論型、論好玩，Jazz 1.5 RS喺同級日系車之中真係冇得輸，不過會唔會「忘本」，為好玩而犧牲Hatchback應有嘅實用性？首先Jazz 1.5 RS由車身尺寸到車廂布局，大抵上都以1.3L版本為基礎，即使車身長度唔到4,000mm，不過有長達2,530mm嘅軸距，車廂闊度又比上一代多咗35mm，乘坐空間絕對見得人，仲記得試車嘅第二天，專登安排咗一位身高接近六呎嘅男同事坐後排，佢都冇投訴，佢認為︰「只要前排唔好向後推到盡，咁都唔算頂腳，而且Head Room都算高，Hatchback就係有呢個好處。」

空間充足之餘，Jazz 1.5 RS嘅座椅調配亦夠晒靈活，放平後排椅背係意料中事，原來座墊都可向上摺起，放置行李就更具彈性，加上前排椅背可以推向後排，變成休息空間叉叉電。最有心思係車尾地台板下隱藏咗一個23L嘅儲物暗格，用嚟放置一啲隨車必備但唔常用嘅物品，例如清潔劑、抹布及維修工具等，最適合不過。