提起中歐國家列支敦斯登（Liechtenstein），你會諗起乜嘢？歐國盃嘅魚腩部隊，定係集郵界嘅聖地（真係郵票個「郵」，唔係異性嗰種呀）？勢估唔到嘅係，呢個無論土地以至人口都少過香港嘅彈丸之國，竟然都有自己嘅車廠，生產嘅仲唔係細容積車仔，而係Super Car─nanoFlowcell Quant F Concept。以後同人吹水講車，咪再以為只有德國、意大利，甚至英國先有本事造Super Car了。

渾圓嘅車尾線條，配合誇張嘅擾流，充滿未來氣息。

中控台布局極盡簡約，所有行車資訊都以屏幕化顯示，出奇之處係定位如此前衞，但係用咗咁多木紋裝飾，真係估你唔到。

尾翼可作兩段式調校，車速超過80km/h就會自動開啟。

車廂採用2+2座位布局，不過照官圖睇，後座都係置物好過坐人。

正如其他Super Car，Quant F亦用上鷗翼式車門，張揚得佢吖！

Quant F由500L離子液態燃料電池，配合廠方自家研發嘅離子正、負電極轉換系統供電，馬力輸出約1,090ps。

雖然列支敦斯登乃小國寡民，但唔代表經濟落後，就以2010年嘅GDP為例，該國就高達36億美元，人均GDP仲去到9萬8千美元左右，高踞全球第二位；除了以銀行業、旅遊業及郵票銷售業務為主要收入來源外，該國亦有一定規模嘅製造業，當中包括汽車工業。嚟自該國嘅nanoFlowcell，就喺去年發表過一款採用離子液態燃料（Ionic Fluid）電池嘅概念車Quant e-Sportlimousine（簡稱Quant E），當時嘅總馬力已經達980ps，廠方喺今年嘅日內瓦車展再下一城，派出馬力過千匹嘅Quant F燃料電池概念車參展。

環保動力新招數

Quant F屬於四門四座位轎跑車，算得上係Quant E嘅改良版，Quant F擁有兩個容量合共500L嘅離子液態燃料電池，比起Quant E多咗100L，配合廠方自家研發嘅離子正、負電極轉換系統，最大功率輸出可達801.69kW，相若於1,090ps馬力，配合雙前速自動波，喺全電動模式下，極速逾300km/h，0-100km/h只需2.8秒，而且零廢排，加上於滿載情況下，續航距離長達800km（Quant E為600km），以一部車身長度達5,257m嘅大車嚟講，表現絕對超越純電動車及氫燃料電池車。

Quant F與Quant E一樣，採用全時四驅模式，高速時仲會自動改為後驅行車，分別裝喺四個車輪上嘅電動馬達，就會由原本四輪一齊發動，變成由後軸嘅兩個馬達全力驅動，增強速度感之餘亦可節省能源。

準備就緒量產在望

至於車身外觀與車廂裝潢，Quant F都有唔少地方有別於Quant E，首先頭燈改用全新嘅QuantEyes技術，利用背光晶體投射出代表Quant系列嘅「Q」字母；尾翼採用兩段式設計，當車速超過80km/h就會自動升起，為車身增加下壓力。此外，單體式車身採用碳纖打造而成，仲有比Quant E更加幼身嘅A柱，達致輕量化效果，而前方視野亦更見廣闊，廠方甚至表示Quant F嘅外觀設計已經百分百達到量產規定，車廂裝潢嘅完成度亦接近九成，有待通過德國及美國嘅撞擊安全測試而已，加上廠方已經為Quant F申請喺歐洲進行路面測試，相信量產之日亦不遠矣。