銅鑼灣擺陣復仇群英會

仲有大約兩星期，《復仇者聯盟2：奧創紀元》（Avengers 2︰Age of Ultron）就會正式上畫，仲快過美國本土！之前Hot Toys已經發動「洗腦式」宣傳活動，又出1/6 Action Figure，又有Cosbaby，仲有失驚無神嘅1/4 Iron Man MK XLIII，以49cm噸位震撼玩家心靈。點知HT主腦Howard似乎未夠喉，索性玩大佢，舉辦「雕塑級電影人偶展」，將復仇者成員及大奸角Ultron以1/1姿態，帶到銅鑼灣Hysan Place，加埋各式展品及期間限定店，務求令大家瞓着覺都掛住「復仇」。

「Ultron Rises」浮空投影機關，以激光方式披露Ultron嘅成魔過程。

現場有得試舉雷神戰錘，女雷神就話好好玩，大家又試吓拎唔拎得起。

新品預覽
1/6復仇者全員列陣，連仲未收訂嘅Thor（後排右一）都有辦睇，雷神粉絲不容錯過。

1/4 Iron Man XLIII亦喺現場展出。

唔只大大隻又精細，Tony Stark頭雕更堪稱歷年最真！

「黑七」Mark VII Stealth Mode Version，顏色與傳統嘅Iron Man截然不同，充滿神秘感。

「鋼鐵軍團」Iron Legion首度曝光，呢隻嘢連Trailer都未見影，依家就畀大家先睹為快。

方力申、洪天明、謝天華

實物原大夠氣勢
1/1 Hulk與Hulkbuster喺啟超道決戰，全個展區高4m、闊6m，夠晒大陣仗！

Iron Man一向粉絲多多，呢部原大Mark XLIII富金屬感又有齊發光裝置，勢必成為「合照」熱選。

Ultron以八呎原大出現，銀色電鍍充滿金屬Feel，由於高人一等，想睇清楚就要上一樓。

利舞臺門外亦有一座Hulkbuster，高3.8m，又有16組發光元件，靜態甫士另有一種氣勢。

限定店Buy List
全港首間Hot Toys期間限定店，專賣各式電影精品。

由日籍設計師Touma設計嘅Tony Stark Artist Mix Figures，於店內進行全球先售，每款售$260。

Hot Toys X :CHOCOOLATE復仇者Tee，限量300件，每件售$298。

HT主腦Howard話好早已經有限定店嘅構思︰「其實一路都想試吓推出其他電影副產品，始終Figure未必個個啱，依家就保證大人細路都買到心頭好！」

HT搞Show唔係新鮮事，由以往一年一度嘅動漫節，再到大型商場展覽，幾乎每逢Marvel Studio有新戲上畫，都例必出勁招。前年《Iron Man 3》上畫時，HT就同Hysan Place合作，將成個Hall of Armor搬到中庭展出，震撼大家眼球，原來當時Howard已經有意思Take Two，佢親自解畫︰「由於先前兩次展覽都好好反應，所以好早已經決定同商場搞多次大Show，不過就算係咁，今次籌備都用咗好多時間，因為我哋對每一隻1/1 Figure都有極高要求，而且今次幾個角色比一般人高咗大半個身，件件都係大製作，好有挑戰性。」

Ultron君臨現場

正因為難度增加，所以先行亮相嘅係一眾「唔係人」角色，分別有Iron Man Mark XLIII、Hulk、Hulkbuster及大奸角Ultron，至於「有血有肉」嘅Captain America及Thor就會緊接亮相。先以1/1 Mark XLIII為例，貫徹HT嘅1/6嘅高神似度，盔甲夠晒金屬感之餘，雙眼及胸口都可以發光，而且表面經過舊化及戰損處理，唔講仲以為Tony Stark飛咗嚟現場。Ultron仲誇張，以八呎原大出現，全身電鍍質感極度像真，內裏仲有紅光淡淡滲出，加上企正喺全場最高位置，入場人士都要抬頭仰望，君臨氣勢無得輸！

街頭上演巨人大戰

除咗中庭，商場啟超道入口亦有1/1 Figure壓場，甚至係全場最癲嘅布置，全組高4m、闊6m嘅「Hulk vs Hulkbuster」對決場面，Hulk肌肉繃緊作勢揮拳，肌肉及頭雕都充滿立體感，而Hulkbuster忠實還原機械結構及金屬舊化質感，配合遍布眼睛、心口、掌心、膝蓋、小腿及背部嘅16組發光部件，喺煙霧底下恍如將戲中嘅街頭大戰搬到香港一樣，Howard亦不忘賣花讚花香︰「大家真係要望真啲Hulk，雖然我們已經有1/6製作經驗，但原來放大後無論肌肉同比例都要再度細執，反而Hulkbuster嘅裝甲及機關，喺製作前期已經解決咗大部分問題。」

黑七有得睇

雕塑以外，現場亦展出咗一系列1/6新作，當中包括Iron Man Mark XLIII、Captain America、Thor、Hulk、Hawkeye及Black Widow等，而率先曝光嘅仲有大奸角Ultron Mark 1、Ultron Sentry及Ultron Prime，加埋Iron Legion鋼鐵軍團，畀大家逐Part比較Ultron大軍嘅唔同形態，入場睇戲前先行做定功課。不得不提嘅，仲有引起全城話題嘅「黑七」Iron Man Mark VII Stealth Mode Version，雖然實物唔似官圖咁「令立立」，但霧黑造型夠晒新鮮感、神秘感，可惜現場有得睇冇得訂，粉絲們要等多一陣了。

想使錢嘅話，大會亦照顧周到，現場設有全港首間HT期間限定店，專賣各式1/6 Figure、半胸像、Q版Cosbaby及獨家電影潮流精品，由日籍設計師Touma擔任原型設計嘅Tony Stark Artist Mix Figures，仲喺店內率先全球開售。除此之外，同場仲有以Iron Legion人偶為主題嘅浮空投影機關，透過激光「描述」Ultron嘅成魔過程，會場另一邊就有雷霆戰錘體驗遊戲，畀大家試試高舉雷神戰錘，試過你就知Super Hero真係唔易做。