BenQ F5抗藍護眼

唔少人都怕電子屏幕釋出嘅藍光會傷眼，因此一系列抗藍光產品，如屏幕保護貼、眼鏡甚至Apps應運而生。BenQ新登場手機F5，亦都以防藍光護眼為賣點，此機望落同一般Android手機冇分別，原來佢內置低藍光模式，用家可以隨時調整屏幕顯示效果，可以睇得舒服唔刺眼。

採用圓角機身，設計大路穩陣。預載Q Home介面，不設功能表，所有Apps都擺於主頁上，需時適應。$1,780

內置1,300萬像素鏡頭，不過對焦速度唔算爽。

喇叭位於機背下方，音量輸出合格。

支援microSD，擴充容量好方便。

機背殼加入磨沙處理，唔易跣手。

內置《Qloud Media》，可以自設Server分享檔案予其他用家。

設有三個瀏覽模式，適合睇不同內容。

「智慧連線」功能可以設定Wi-Fi及網絡數據於屏幕關閉時停用，即時變得慳電。

拍攝模式齊備，可惜拍攝質素唔算好高。

機背殼拆得，不過電池就唔拆得，設計叫人費解！

近年唔少醫學調查都話長期望住屏幕，藍光有機會傷害眼睛，所以唔少電子產品都強調防藍光或者低藍光；有見及此，BenQ就推出市場上首部具備低藍光功能嘅手機。其實手機內置一個「低藍光模式」，提供「多媒體」、「網頁」、「閱讀」三個瀏覽模式，分別代表可降低30%、50%、70%藍光傷害。即場試用，發現效果似將屏幕色調變暖及降低整體亮度。雖然冇專業儀器檢測係咪有效降低藍光，不過開啟相關功能後，睇屏幕時畫面明顯冇咁刺眼，亦即係睇得舒服咗，效果明顯。廠方表示，F5低藍光功能係基於硬件上嘅研發，所以理論上效果比起一般外置式抗藍光產品好。

硬件不俗又抵玩

賣相方面，F5用上大路直板圓角設計，全機黑色，聽筒網格、喇叭輸出及主鏡頭金屬圈就有紅色作點綴，低調得來又有少少特色。另外，機背加入磨沙處理，手感不俗；唯一要扣分就係機背殼雖然可以拆開換SIM及microSD記憶卡，不過電池竟然採用內置式，冇得換，加上電池容量僅得2,520mAh，睇嚟用家要充電器隨身。幸好F5內置「智慧連線」功能，可以設定Wi-Fi及網絡數據於屏幕關閉時停用，大為慳電。規格方面，此機備有5吋720p屏幕，解像度一般，勝在採用IPS面板，可視角極高，睇片、睇相效果都算合格。F5仲用上1.2GHz四核心處理器、2GB RAM；有1,300萬像素鏡頭以及支援4G網絡，效能其實唔算差，屬中階定位，而定價只係千八蚊有找，比唔少同級機款抵玩。