早前日本Game書評選歷代高達TV動畫，被視為UC年代最後篇章嘅《V Gundam》10大不入，排喺第11位，老實講，故事的確偏弱，拖累晒成套作品嘅人氣，不過講到機設，筆者真心覺得唔差，例如故事前半段嘅主角機Victory Gundam（LM312V04），機體線條圓渾，唔似元祖、Z及ZZ等老祖宗咁硬繃繃，依家睇番都覺得有新意。如果你都有同感，Robot魂啱啱推出嘅V Dash Gundam會唔會成為你嘅新歡呢？

Robot魂Victory Dash Gundam（LM312V04+SD-VB03A）建議零售價︰$409.9

腰位及腳肚嘅噴射位都可揭起，不過小心腳肚位嘅組件都幾易甩。

由於多個關節都有所改動，令整體可動性得以改善，擺甫更自然。

頭部雕工與滲線都算清晰，尤其是主色變成鵝蛋白，更加似1993年嘅原本機設。

由造型到可動性方面，今次嘅Dash背包都算交足貨。

拆除Dash背包，換上隨盒附有V Gundam原裝背包，就可變番做輕裝嘅基本形態。

關節改動多

記性好嘅粉絲應該記得，Robot魂喺2011年已經出過V Gundam，跟手再以Option形式另外推出Dash組件，依家博大霧又出過？稍安毋躁，首先今次係一盒過有齊V Gundam加Dash組件，唔似上次分開出，最重要係V Gundam嘅主體並非沿用舊版，雖然未至於100%重新設計，但改動亦都唔少。造型方面，前臂由舊版嘅平直變成弧位，主色就由純白變成鵝蛋白，更加貼近原來嘅機設特色；至於可動性嘅改動更加明顯，肩位及膝蓋都改用拉出式關節，而髖位及腳背都有新關節，「擺甫」能力遠勝舊版，視之為「Version 1.5」也不為過。

重火力武裝

附件方面，最重要嘅當然係安裝咗一對加農炮嘅大型背包，除咗炮身可以前後轉動，亦可微微向左右擺動，就連背包下半截都可上移至水平狀態，除此之外，腰位背後以至腳肚嘅噴射位都採用外揭式設計，將當年嘅機設特色還原出嚟。至於V Gundam嘅基本武裝，包括激光槍、激光劍、激光盾及激光「扇」，以及作為Dash附件之一嘅手提式大型粒子炮，都喺今次嘅「1.5」版本有齊，遺憾在於當年Option組件附有嘅「兔仔耳」高達頭，今次唔見影，可惜！

查詢︰2433 1828（瑞華行）