足球界同車壇嘅合作例子，多到冇朋友，好似Pirelli同國際米蘭嘅親密關係，就嚟跨越20年，仲有皇馬球星任揸奧迪（Audi）名車等等，不過要數最襯嘅一Pair，筆者「肯肯定」係PUMA × Ferrari，事關兩者都快到屈機，法拉利（Scuderia Ferrari）車隊快絕車壇唔在講，PUMA就有evoSPEED系列波Boot，成為綠茵場嘅草上飛。唔經唔覺，原來呢對輕功雙絕啱啱聯手10周年，梗係要整份大禮賀一賀佢！

PUMA evoSPEED 1.3 F947 FG（全港限量12對）　$1,999

由於鞋面外側幾乎全被「進氣口」佔據，所以弧形嘅PUMA商標搬去鞋身內側。

鞋釘款式都以速度行先，令用家更易起步、加速，化身為足球場上嘅法拉利，要對手食塵。

鞋身兩側都有一排氣孔，設計靈感嚟自法拉利車身上嘅進氣口，有Gimmick之餘，仲可以偷輕鞋身重量，以及增加透氣度。

PUMA SF Premium Polo$1,900

PUMA SF Premium Pants$3,500

今次的PUMA × Ferrari服飾，統統由意大利製造，質素絕對有保證。

喺過去10年，PUMA唔只為法拉利車隊提供專屬服飾，兩者亦聯乘推出過賽車鞋、Tee、風褸等特色產品，2009年仲出過「v1 815」呢款紀念版波Boot。今次因為合作10周年而再度「借題發揮」，PUMA以旗下目前最輕嘅波Boot—evoSPEED 1.3 SL為基礎，唔只換上代表法拉利嘅鮮紅色，仲加入唔少車廠嘅招牌設計，無論足球迷或拉利迷，見到一定Like爆！

輕量化才是王道

唔理係古天樂都擁有過嘅360，或者郭富城嘅珍藏Enzo，以至現時最新型號LaFerrari，法拉利點解跑得快？除咗大馬力，仲要車身輕，而原裝evoSPEED 1.3 SL已經係PUMA最輕嘅波Boot，今次推出特別版evoSPEED 1.3 F947，設計團隊決定再玩激啲，一於由法拉利跑車取經，將車身上嘅大型進氣口，化身成evoSPEED 1.3 F947鞋身內外側嘅透氣孔，藉此偷輕鞋身，務求愈輕愈快，而且透氣位多咗，照計都會舒服咗。

全球限量947對

除咗鞋身兩側，鞋頭與鞋籠都有更明顯嘅法拉利標記，前者嘅鞋帶區底部印有盾形嘅黃色廠徽，至於鞋尾內籠亦印咗法拉利嘅駿馬圖案，細心嘅話，仲會發現鞋籠、鞋墊及鞋舌，都用咗啡色真皮製成，靈感嚟自法拉利嘅真皮桶椅，入型入格又夠Grand。至於鞋名方面，點解叫做「F947」？首先F代表Ferrari，而法拉利第一款公路型嘅量產跑車，就喺1947年面世，所以唔只叫做F947，而且全球限量亦只有947對，據知香港配額只有12對，夠晒罕有，着住佢踢波，都幾難同人撞Boot，不過，你捨得着咩？