幻之Air Max始祖夢成真

做人，真係有好多大日子要記住，你本Schedule除咗Mark低咗阿爸阿媽男/女朋友生日，仲有相識/結婚紀念日之外，仲有冇圈實「3˙26」呢？身為剔牌超級粉絲，冇理由唔識「3˙26」啩？如果「鞋神」Tinker Hatfield冇去過巴黎龐比度藝術中心，28年前嘅今日就唔會有Air Max 1誕生，照推算，亦唔會有之後嘅Air Max 90、Air Max 95及Air Max 360等等經典鞋款，冇Air Max嘅NIKE，實在難以想像……不過你又有冇諗過，原來Air Max嘅老祖宗唔係Air Max 1，而係另有其鞋呢？

Air Max

多位剔牌嘅運動明星，由左至右包括足球界嘅Neymar Jr.、網球界嘅Serena Williams及Roger Federer，仲有女籃運動員Skylar Diggins，早前都同Air Max Zero合照，齊齊為新鞋造勢。

Hatfield（左）與McMillan雙劍合璧，令螫伏多年嘅Air Max Zero得以矚目現身。

$999（今日上架）
充滿傳奇性嘅Air Max Zero，復古與前衞融為一體，可說是第二個Air Max Day嘅最大賀禮。隨盒送上Air Bay作小禮物，更添收藏價值。

外底選用Air Max 1 Ultra款式，與今年初推出嘅Air Max 1 Ultra Moire屬於同一類型。

鞋尾嘅環形護帶，自然令人想到另一個經典鞋款Huarache。

鞋身多處都以熱熔技術組合而成，達至無縫效果。

外露式嘅Air-Sole，賣相似足28年前嘅Air Max 1。

鞋舌與鞋身由一幅過物料製成，做到輕巧又貼腳。

鞋頭用咗單絲紗網製成，做到輕巧又透氣。

原來鞋籠嘅踭位藏有方格形嘅泡棉墊位，增加舒適性。

塵封咗29年嘅Air Max Zero草圖，不但重見天日，而且進行量產，Air Max粉絲請鼓掌！

真相由零開始

Air Max 1於1987年3月26日面世，自此為NIKE開創出另一個神話，其實神話嘅醞釀期，仲要推早多一年。話說80年代初Nike Air一舉成名天下知，不過Hatfield不會故步自封，反而想到不如將Air-Sole做得再大啲、明顯啲，令鞋迷一眼而知Air嘅震撼力，當佢到龐比度藝術中心過後，不但引發出外露式Air-Sole嘅構思，仲有好多劃時代嘅概念，都想放喺新鞋身上，例如鞋尖唔再包邊嘅鞋面，鞋踭刪除穩定器，改用環形護帶等等，如此種種，都畫喺一張草圖上，而草圖嘅名字就係Air Max Zero。Air Max Zero唔只劃時代，以今日嘅眼光嚟睇，同樣前衞過人，正正設計上太過超前，當時嘅製作技術與材料都跟唔上，Hatfield惟有多次修改，最後變成大家耳熟能詳嘅Air Max 1，而Air Max Zero就只停留喺概念圖階段。