我曾經買過Package的美容院常常打電話來：「小姐，我睇番記錄，你好耐冇嚟做Facial喇，幾時得閒過嚟？我幫你約個時間吖！」「你多啲嚟啦，如果唔係啲Package又就快到期o架喇！」是的，是「又」。我在處理這方面的東西是弱中之弱的，到集團式的美容院做Facial，多多少少美容師總會在你本身的Package上，再Sell你買多一點點，例如基本的Facial上可以加個綠茶面膜呀、眼膜呀、頸膜呀、耳膜呀、橫膈膜呀……躺在床上的我，真是躺着也中槍，總是抵不住她們的連番追擊，好啦好啦，買少少啦。

可是買了之後，又沒時間常去，往往等到Package快到期，拿拿臨去做幾次，她們就會再看準時機：「其實你可以唔使咁趕用晒o架，嗱，如果你幫我買多個飛天超勁頂級魚子精華素套餐，我幫你Extend之前個Package多半年吖！」就這樣，我又買了，利疊利，永無止境。最近聽友人說，有班仔仔，專在網上「識女仔」（其實我真係好文雅），進而約出來見面，約會的地方，竟然是美容院！說法是：「做嘢做到咁攰，不如一齊去做Skin Care Relax吓吖！有間我朋友開嘅，我幫襯咗好耐，我打去Book位吖！」一個男性約你一齊去做Facial，你沒有一點猶豫嗎？沒有一絲毛管戙嗎？除非他是「姊妹」啦，但他明明在網上「識女仔」啊！只能說一句騙徒手法真的層出不窮，但我倒希望那些Sell我買Package的是這種人，那我一定不會中招。