Sony Xperia E4 Dual 外遊新寵

話咁快就到復活節，各位旅遊達人相信已經蓄勢待發準備出門；外遊時最緊要就係買番張當地上網SIM，想再方便啲的話，雙卡手機絕對幫到手！最近Sony就推出雙卡手機新作Xperia E4 Dual，機價夠平，但就有齊大芒加靚仔賣相，買來旅行粗用或當Second Phone就啱晒。

Sony Xperia E4 Dual $1,099
備有5吋屏幕，提供黑、白兩色。

內置「雙SIM卡設定」，可以隨時設定哪張SIM成為主卡。

《Party Share》可以與朋友分享音樂播放清單及相片，相當好玩。

備有Stamina及Ultra Stamina兩個省電模式，想電量襟用的話必開！

雖然只屬入門級手機，不過其500萬像素鏡頭都支援HDR、Timeshift burst、實時美顏等功能。

與大部分同廠手機一樣，備有圓形金屬電源鍵。

精鋼SmartWatch 3 $2,698
精鋼版設計與普通版本功能一樣，其不銹鋼物料質感極好。

採用傳統microUSB充電，毋須要用專屬底座，方便得多。

一如大部分Sony手機，Xperia E4 Dual用上自家的OmniBalance「全方位平衡」設計，不過邊角較Xperia Z3、Z3 Compact等型號圓渾，配合招牌式鋁合金圓形電源鍵，整體感覺年輕；可惜僅提供黑、白兩色，若然有更多顏色選擇就更好。值得一提，此機之背殼可以隨時拆除，不過卻採用內嵌式電池，換言之不能換電，拆殼純粹為入SIM以及microSD卡，設計略嫌奇怪。雙卡功能方面，此機設有兩個microSIM卡槽，支援2G及3G制式，雖然只可同時一張SIM使用3G網絡，不過就可以隨時於系統切換主卡，毋須將SIM卡換位，都算方便。

超強續航力

此機備有5吋屏幕，可惜解像度僅得960×540，相對市面上大把720p、1,080p屏幕，細緻程度明顯輸蝕；幸好IPS屏幕可視角夠高，加上大大個主頁圖示，睇得相當清楚。另外，此機雖然只得2,300mAh電池容量，好在內置Stamina及Ultra Stamina兩個省電模式，前者會於屏幕關閉時自動關閉Wi-Fi、流動數據等大部分應用程式；後者則只保留電話等基本功能，兼且熄晒流動數據及Wi-Fi連接，令電池續航力即時大幅增加。小記測試過，電量剩大約75%時開啟相關模式，備用時間竟顯示為18日，冇電時就大派用場。

《Party Share》齊齊玩

軟件方面，Xperia E4 Dual預載Android 4.4作業系統，較特別的程式要數到《Xperia Transfer》，它可以將舊有Android、iOS或Blackberry裝置上的聯絡人、相片、應用程式、音樂、訊息等資料轉移到新機，換新手機時就零舍方便！另外仲內置《Party Share》，只要各用家連接同一Wi-Fi網絡，就可以用「主持派對」功能，於App內分享音樂播放清單、相片，最正係其他Android手機都可以Download《Party Share》齊齊玩，不過就暫時只有Sony手機先可以「主持」，其他品牌的手機就淨係可以加入Party。