女生也啱揸　Jeep Cherokee Limited 3.2 4WD

早前小記向代理借嚟Cherokee Limited嘅頂級型號—3.2 4WD進行四日深入測試。

Jeep Cherokee Limited 3.2 4WD

車內景致咁開揚，全景觀玻璃天幕頂實在居功至偉。

引擎容積去到3.2L，力量輸出自然唔嘢少，馬力就有271hp。

多功能軚環表面鑲有真皮及金屬飾板，都算講究。

Parkview泊車鏡頭連接中控台嘅8.4"輕觸式屏幕，車尾情況一眼睇清。

前座高度及椅背斜度，都可按鍵自動調校。

由於軸距長達2,700mm，後座空間直接受惠。

尾門打開後約有1,700mm高，好彩用車匙就控制到尾門開關，而尾箱左面又有閂門鍵，哈比人一族都操作得到。

雖然Cherokee Limited大大部，不過偏幼嘅A柱唔會阻住睇位，而且行車表現夠晒穩定，又有泊車鏡頭及鄰車切線提示功能，新牌人士都好易上手。

借車前一天，幾位男同事都不約而同提醒筆者，Cherokee嘅車體有番咁上下，唔同筆者平日揸開嘅揭背車仔，要加倍小心；

借車第一天，老實講，對於身高只得五呎一吋嘅小記嚟講，企埋Cherokee Limited旁邊，的確「強弱懸殊」，個心係有啲驚，不過唔通淆底咩？一於「賤輝」上身︰「怯，就會輸一世」，開車；

第四天還車，冇穿冇爛，我講Cherokee呀，證明做人要有Guts外，其實大大部嘅Cherokee一啲都唔蝦女仔囉！

Cherokee Limited屬於中型SUV，車身體積去到4,624×1,859×1,681mm（長×闊×高），雖然大大部，但勝在A柱尺寸恰到好處，轉彎睇位冇難度，加上預載咗盲點監測系統（Blind Spot Monitoring），透過雙雷達偵測車身兩側盲點範圍，如果隔籬線有車駛近，側鏡就會亮起橙色三角燈提示，主動減低碰撞風險。再者Cherokee又有Parkview泊車鏡頭，將車尾景象傳送到中控台嘅8.4"屏幕，倒車、泊位一樣方便。

尾門開關夠細心

車廂設備既有原廠高級皮椅、前座電動調校功能及雙區式恒溫冷氣、全景觀玻璃天幕頂、錶板中央7"彩色屏幕等，以及最好用嘅中控台頂層8.4"屏幕，可以輕觸式操控音響及空調等設備，加埋獨有嘅Uconnect聲控功能，方便之至。小記至Like嘅係電動尾門開關功能，駕駛席前方及車匙，都設有尾門開關鍵，就連尾箱左面都有，啱晒小記呢啲細細粒嘅駕駛者，毋須趷高個人去閂尾門，抵讚！

畀足安全感

其實喺幾個月前，筆者喺一次越野活動中都揸過Cherokee Limited，今次就由Off-road轉On-road，感覺又如何？第一個感覺係好有力，由於3.2L Pentaster V6引擎採用咗VVT可變活瓣正時技術，馬力與扭力分別去到271hp及32.1kgm，喺清水灣一帶嘅山路走一轉，就算遇到唔少坡幅幾大嘅上斜路段，引擎表現依然有心有力，照去可也！入得山路，當然唔少得急彎過後，就算頻頻加速，呢台引擎都冇托手(月爭)，筆者用埋九前速自動波箱嘅手動換檔功能，又將Selec-Terrain System由Auto換成Sport，力量表現隨傳隨到之餘，攻彎時無論左拐或者右轉，車身都冇過分傾幅，睇得出懸掛組合跟全時四驅系統相當合拍。