某個春茗活動中，一圍枱的女士剛好處於呆滯狀態。飲飽食醉，又應酬了半晚，係咁上下的了。

忽然間，一名長輩帶着一名極靚仔的親戚前來祝酒，立刻，全圍枱的女士一秒內極速站立，眉開眼笑地又如狼似虎地熱烈舉杯。

靚仔走後，所有女士就好似睡醒了那樣，你一言我一語說着這名靚仔。而回想靚仔在祝酒時的神色，明顯就是有點被嚇壞，他的表情在說：「這班女人究竟想點？這圍枱好似幾危險！」

所以嘛，靚仔誰會不喜歡？就算本身揀選了平庸外表伴侶的女士，心裏也一樣喜歡靚仔的吧！有得揀，當然是揀靚仔！識食，當然要食靚仔！

揀了壽頭一樣的伴侶的女性，統統都是有苦衷有原因的。而當然，她們會告訴壽頭伴侶，她們最憎靚仔。

壽頭伴侶可以選擇去相信，不過，壽頭伴侶同時候可以自問，娶了外表平凡妻子的自己，難道又會真的討厭靚女？無可能的吧！

就是這樣了。所有人的心底都愛靚仔靚女，不過，去到揀選伴侶之時，再唏噓的結局都會發生。

女人愛靚仔的發洩途徑必然是迷偶像。亞洲男人有樣大方，就是，容許妻子狂迷靚仔偶像。