從速上車　Honda Odyssey

市場上大部分MPV都強調乘坐舒適性，好少喺駕駛樂趣上落足料，本田（Honda）Odyssey就夠膽行另類，既有185ps充沛馬力，紮實底盤配合低地台設計，帶來Sedan-like嘅房車化操控，就算係七人車都有駕駛趣味。提提大家，環保汽油私家車稅務寬減計劃將於下月一日起取消，出車仲想享有稅務優惠，必須於本月內完成出牌，剩番唔到兩個星期，行動要快！

中排設有兩張OTTOMAN大班椅，乘坐舒適性極佳。

後排空間絕非Dog Seat，腿部空間就可見一斑。

後排可以完全收埋於地台底下，藉此得出大片置物空間。

恒溫冷氣按鍵用咗輕觸式設計，夠In！

車上設有多角度拍攝鏡頭及360°鳥瞰系統，泊車輕而易舉。

車頂設有電動天窗，增加車廂開揚度。

有心有力 KO長命斜

今次嘅Odyssey測試過程長達一星期，中途順便約埋幾個朋友遊車河，兜足一整日，包括後排在內嘅全車乘客，統統對空間感讚不絕口，尤其是中排大班椅嗰兩位仁兄，全程開埋個伸縮小腿墊出來，從倒後鏡睇見佢哋個歎樣，確有交換司機位置嘅衝動。若然用唔着後排，大可將佢翻至地台底下，中排就可向後移，最盡幅度達740mm，空間之大媲美飛機上嘅頭等客艙。

而頭冚下嘅2.4L引擎結合咗Earth Dream Technology及i-VTEC技術，導入埋缸內直接噴注燃油系統，馬力及扭力分別達185ps及24.0kgm。實際表現成點？舉個例子，載住六名成年人由筲箕灣入石澳，於柴灣道上斜燈位停定再起步，半踩油門已有充沛嘅起動力，短時間已可將車速提升至50km/h，就算遇到坡幅更大嘅斜路，都唔會出現拉牛上樹嘅場面，而且新Odyssey預載咗斜坡發進輔助系統（HSA），高負載下於大斜坡起步都唔會溜後，駕駛者自然放心晒。

出入方便追加雙趟門

燃油開支隨時佔養車成本一半，甚至更多，新Odyssey又表現如何？廠方特別為Odyssey加入咗ECON Mode節能模式及Idle Stop智能引擎熄火功能，根據日本JC08模式計算，耗油量可低至13.7km/L，比上一代慳咗22.3%。此外，過往唔少人都想追加嘅雙電趟門，今代Odyssey終於實現，只要輕拉手柄，側門就會自動打開或閂上，開啟幅度仲多達750mm，加埋低地台，無論長者或兒童都可輕鬆上落，非常User-friendly。