我做的戇居事太多，《戇居士大全》又可以重出江湖。話說有天洗頭時，太多事情在腦子裏轉，沒專心洗，結果倒了沐浴露出來（湊巧這陣子用的沐浴露跟洗頭水顏色一樣，都是透明藍，沒防範！），直至捽了上頭，覺得味道有點不對勁（洗頭水明明是薄荷味，怎麼今天變了香香的），才發覺出了岔子。

我以為我那麼戇居才會出這亂子，原來身邊不少朋友也有同類經歷，種類多得可以在超級市場上架─（1）沐浴露上頭，話「我都試過」的至少有七、八位朋友；（2）把護髮素當了洗面膏；（3）把柔順劑當成護髮素（都係整軟啲嘢啫，係咪都可以用？）；（4）洗面膏當牙膏（唔關你事嘅，一定係佢個包裝整得太似，都係唧出嚟）；（5）Hand Cream當牙膏（都係唔關你事嘅，都係佢個包裝整得太似，但係刷完啲牙有冇覺得潤咗呢？）；（6）洗頭水當洗手液（都捽得出泡）；（7）牙粉當洗衣粉，唔……這個嘛，好像有點誇，慢着，牙粉是用來幹甚麼的？清潔牙齒？怎麼牙粉會和洗衣粉放在一起呢？意粉又會不會都放在一起？不過幸好不是掉轉，洗衣粉當牙粉就大鑊了。當我發生了這宗戇居事之後，最令我安慰的一句說話是：「唔使怕，其實係通用嘅！」洗頭水和沐浴露是通用的？那麼其實浴室內根本不需要擺那麼多一樽樽的東西？只放一樽就夠晒數？