想知每年手機動向，除要留意年初拉斯維加斯的CES之外，亦要跟實春天於巴塞隆拿舉行的MWC（Mobile World Congress）。今年CES展上亮相的新手機寥寥可數，原來各大廠商儲定彈藥，等到MWC先至埋身肉搏；會場上可見，一眾品牌都各出奇謀，火力全開，特色新品目不暇給。

M4 Aqua備有廣角前置鏡頭，多人自拍都冇問題。

M4 Aqua外形激似Xperia Z3，重量較輕，屏幕解像度則下調至720p。

支援防水，充電位又毋須用蓋保護，相當新穎。

Xperia Z4 Tablet可配專用藍芽鍵盤，鍵盤備有三個功能鍵，操作就手。

改用全新介面，一按左下角三張圖示即會彈出Recent Apps。

Magna機身帶少少弧形，正面睇有點似G Flex系列。

Leon及Joy設計相近，機面底部有一截玩雙色。

Spirit設計似Magna，不過尺寸細些少，規格亦較低。

現場有多款不同錶帶及錶面配搭的Watch Urbane，一改普通智能手錶的科技味。

VIBE Shot備有5吋屏幕及採用Qualcomm八核心處理器。

HTC One M9設計大致與上代M8相同，亦設有BoomSound前置喇叭，支援Dolby 5.1音效。

用上全新HTC Sense 7介面，頁面簡約，更可以自設主題及顏色用調，自由度極高。

HTC Grip黑撞青色好搶眼，可惜現場不能試玩，未知功能是否好用。

Android都有小展區，雖然冇注目產品，不過得意布置都好吸引。

Sony Xperia Z4 Tablet 輕過對家

日本代表Sony推出平板及手機各一，當中以Xperia Z4 Tablet最備受注目，它秉承Xperia Tablet系列輕薄傳統，10.1吋機身僅厚6.1mm，Wi-Fi及4G版本分別重389g及393g，比起屏幕尺寸一樣、同係賣輕薄的iPad Air 2輕一大截。此平板採用2K芒，顯示超清晰；而且內置最新Qualcomm Snapdragon 810八核心處理器，效能夠撐，預計第二季度上市。至於新手機Xperia M4 Aqua驟眼睇恍如Xperia Z3，因為同樣採用5吋屏幕以及採用Omni Balance設計；實情佢屬中階機，賣點在於防水防塵之餘，仲引入無蓋式microUSB，充電不用次次揭蓋如此麻煩。另外，其前置500萬像素鏡頭支援88°廣角，自拍、群拍都方便。

LG中階機　一門四傑

LG力谷彎機G Flex 2之外，仲一口氣推出四部初中階型號手機，分別為5吋芒的Magna、4.7吋芒的Spirit、4.5吋芒的Leon以及4吋芒的Joy。當中Magna、Spirit、Leon大玩招牌背鍵設計，而Magna、Spirit更用上弧形機背，Leon就用類近G3的金屬橫紋。規格上，定位最高的Magna只係內置1.3GHz四核心處理器、800萬像素鏡頭。智能手錶亦有驚喜，推出Watch Urbane及Watch Urbane LTE兩款新作，設計比一般Smartwatch成熟，錶殼用上不銹鋼，仲有金、銀配色，搭配皮帶、鋼帶甚至膠帶都好靚仔。兩錶都備有1.3吋POLED屏幕、Qualcomm處理器等硬件，較特別是Watch Urbane LTE支援4G制式，配合相關網絡服務，不用按手機都可以獨自上網。另外，新錶仲飛起Android Wear，改用自家Web OS介面，整體操作其實分別不大，都易上手。

HTC One M9　雙Tone金屬

HTC於展覽開幕前一天提早發布新作HTC One M9，MWC展上當然可任玩唔嬲。新機延續M7、M8的金屬機身，並大玩雙色調，相當獨特，手工亦非常好。外形及屏幕尺寸雖然與上代M8相似，不過硬件上就有多樣升級，例如處理器換上Qualcomm Snapdragon 810八核心，配3GB RAM，效能強勁。而拍攝功能亦大幅提升，前置鏡頭換上Ultra Pixel，適合低光下使用；後鏡頭就有2,000萬像素兼且可錄影4K短片；新機預期3月中旬上市。同場亦有展示HTC Grip智能手帶，它設有1.8吋屏幕，防水防塵，支援GPS定位，亦可記錄運動數據。

Lenovo變種手機　影相靚聲

Lenovo今年MWC表現積極，登場新產品中，最過癮就要數VIBE Shot，其5吋芒機身睇落平平無奇，原來機背特別設計成數碼相機模樣，拋光鏡面及金屬髮絲紋極有型；鏡頭質素認真不俗，有1,600萬像素，兼具防手震功能，並特設實體鍵，一推即可轉換Smart或Pro兩種拍攝模式，相當方便。Lenovo亦玩埋靚聲，手機A7000以及平板TAB 2 A8、A10都支援Dolby Atmos杜比全景聲音效，現場就有耳機畀大家即場試聽，音效好似從四方八面傳過來，立體聲效果勁誇張。同場仲有Pocket Projector，機仔細細但就可以投映出110吋畫面，隨時隨地變做家庭影院。