HTC Desire 826 Dual SIM　自拍最強

自拍呃Like，首要條件係相中人夠索，此外相片質素都好重要，雜訊多兼起渣，點靚都補唔番！日前HTC就推出新手機Desire 826 Dual SIM，主打雙卡雙待功能外，仲首度將招牌UltraPixel技術移到前置鏡頭，低光下玩自拍都冇甩拖，仲有即時美顏模式、分鏡拍攝以及貼紙相機等功能，有排玩。

$3,398

5.5吋屏幕解像度由上代720p提升至1,080p；此機改用了Android 5.0作業系統，不過整體布局與舊系統接近。

改用UltraPixel前置鏡頭，惟不設補光燈。

提供白撞杏及藍色兩款選擇，機背經過磨沙處理，不易跣手；1,300萬像素後置鏡頭對焦爽快。

全新八核心處理器行Benchmark得到逾35,000分，直逼上代機王LG G3。

內置「雙網絡管理員」，可簡單設定兩張SIM卡。

用上隱藏式BoomSound前置喇叭，聲音響亮。

雙卡槽均用nanoSIM，另有microSD記憶卡槽。

HTC嘅UltraPixel鏡頭慣見於旗艦型號機背主鏡頭之上，今次Desire 826 Dual SIM就改為配置喺前置鏡頭，相片像素只得1,520×2,688，約400萬像素，唔算大，不過就方便大家上載到社交網站；最重要係UltraPixel感光元件比一般鏡頭大，吸光量、雜訊控制都較好，配合F2大光圈，喺室內、昏暗嘅地方自拍都掂！現場搵靚女Model試拍，相片清晰雜訊少；加上可即時美顏，有乜瑕疵都可以抹走。另外，此機仲可以玩分鏡拍攝及貼紙相機，前者將畫面上下分割並分別用前後鏡拍攝；後者可以拍攝出格仔組圖，連後製Apps都唔使開。而主鏡頭就有1,300萬像素，並有手動模式、HDR、全景、防手震等，亦可拍慢動作電影，拍攝功能相當齊備。

八核搭載新系統

設計方面，出奇地唔似上代Desire 820 Dual SIM，反而似Desire Eye，機面同Desire Eye一樣備有特大前置鏡頭，同樣用隱藏式BoomSound前置喇叭；至於屏幕就改用5.5吋1,080p規格，另機背經磨沙處理，不易跣手。可是，新機體積跟上代相近，不過卻重超過18%，達183g。至於規格，佢內置Qualcomm Snapdragon 615 64bit八核心處理器，配備2GB RAM；仲預載最新Android 5.0作業系統，操作、開Apps都流暢得多。Desire 826 Dual SIM支援雙卡雙待，更兼容GSM、WCDMA、TD-SCDMA、FDD-LTE、TD-LTE多個中港網絡制式，經常北上就最啱用；同時此機具備動態轉換功能（Dynamic Switch），可設定SIM1或SIM2接收4G網絡，毋須限制SIM卡擺位，超方便。