駕駛族必Look羊年催運攻略

對駕駛一族而言，最啱聽嘅新年祝福，當然係出入平安、路路亨通，除咗個人要事事小心，以及做足汽車保養之餘，或者從玄學方面都可幫到手，例如選擇適合嘅數字與英文字母做車牌組合，甚至揀選流年大利嘅車身顏色等等，據講都有助增加運勢，今次就邀請到玄學家林炳南師傅教路，一於幫各位車主打好運勢迎羊年。

FIAT嘅品牌字母中，已經有催旺桃花運嘅字母（F），加埋紅色車身，身為車主想必桃花運大旺。

黃色係今年嘅大利顏色之一，有意換車或出車嘅朋友，不妨對黃色車加多啲分。

玄學家林炳南師傅稱，今年乙未年以1、2、6及8嘅數字，以及B、D、F、G、L、P、Q、R、Y及Z嘅英文字母組合最為有利。

D及F屬羊年大利嘅英文字母，自訂車牌時不妨多多考慮。

喺尾箱中下方位置擺放金元寶，有助提升財運。

喺車廂放置一對鮮色公仔，有助催旺桃花運。

想催旺桃花，林師傅話喺車內擺放一對紅色雨傘都有幫助。

於尾箱右上方或左中位置擺放黃色物品，有助鎮定車主情緒，提升行車安全。

唔少新車嘅多功能軚環都附設免提通話按鍵，讓駕駛者手不離軚都可保持通話，記住善用呀。

玄學家林炳南師傅

大家不妨喺自訂車牌時自組心水嘅升運組合，睇睇會否喺羊年財色兼收。

玄學資訊僅屬參考，想出入平安，最重要都係日常駕駛小心為上。

中國人鍾意講意頭，今年係乙未年，據林師傅所講，按照九宮飛星圖計算，有利嘅數字及英文字母，分別為1、2、6及8，以及B、D、F、G、L、P、Q、R、Y及Z，林師傅話以上組合配搭，除可用於自訂車牌服務，甚至喺揀汽車型號以至品牌時，都可作為參考之用，無傷大雅。

車廂吉祥物適可而止

如果閣下好想提升財運與桃花運，林師傅就有以下貼士，他指出︰「今年最有利財運嘅數字為1，英文字母方面則為F、P及Y，而今年嘅財位喺北方，新年期間大家可以向北方走、行大運，順道參拜廟宇，對加強個人財運都有所幫助，除此之外，今年不妨喺車尾箱嘅中下方位置擺放銅錢或金元寶，亦有催財作用。」至於桃花方面，林師傅繼續教路：「數字與英文字母之中，以2、3及A、K、T最為有利，鮮艷顏色亦有助增加運勢，當中包括紅色、紫色及粉紅色，大家不妨喺車內擺放相關飾物，甚至桃花、朱古力，或及一對公仔，都有增強桃花嘅作用。」對此筆者一定要提醒大家，放置過多、過大件嘅飾物喺車內，會影響行車安全，適可而止。

四至九月小心路滑

林師傅進一步指出，乙未羊年三碧星落入中宮，容易令人脾氣暴躁，三碧星亦代表車，代表發生突如其來嘅碰撞機會特別多，駕駛者要好好控制情緒，他特別提醒：「今年五黃凶星喺西方，以香港嚟講，可以理解為由葵涌至屯門一帶，而今年嘅二黑病符星落於東南面，大概由牛頭角至將軍澳及清水灣等一帶，除咗有較大機會發生交通意外，亦代表有大塞車嘅可能。此外，乙未羊怕下雨，四月至九月為雨季，天雨路滑，大家揸車更加要提高警覺。」各位車主一族，記住要Check清楚制動系統是否運作正常，若果迫力皮與輪胎都有明顯損耗，就要及早更換了。

尾箱乾坤平復情緒

平時心情唔好，可以睇《心靈雞湯》調劑吓，不過揸車時想控制脾氣，又有咩法寶？林師傳建議：「平時揸車較為躁底嘅駕駛者，可於尾箱左邊中間位置，擺放平安符、黃色反光衣或雪糕筒等物品，總之要黃色，有助穩定情緒、提升行車安全運。至於駕駛態度斯斯文文嘅，可選擇擺放黃色物品於尾箱嘅右上方位置。」此外，夾啱車身顏色，對駕駛者亦有催運作用，林師傅再度教路：「今年最有利嘅顏色，分別係粉紅、紅、綠、藍、黄、杏、啡，而金、銀、白與黑色就係今年最不利嘅顏色，若果可以撇除個別對顏色嘅偏好，有意出車或換車嘅車主，不妨用作參考。」最緊要嘅，都係揸車時刻保持警覺、禮讓，祝各位駕駛一族羊年路路暢順、大路小路都平平安安心情好！

自訂車牌你要知

運輸署喺每年嘅1、5及9月都會接受自訂車牌申請，整個程序要經過入紙申請及拍賣，當你提出一個自訂組合申請後，便要交付$5,000，若有一個人以上申請同一個組合嘅話，就要進行拍賣。自訂車牌組合中，唔可以有令人反感、不雅等意思，亦不可與政府部門車牌近似或令人混淆，另外，現行香港車牌中，「I」、「O」及「Q」均不得使用，而整個自訂組合以八個位為上限。而市面上有唔少專營自訂車牌服務嘅公司，大家嫌過程繁複嘅話，大可直接透過呢類公司買個合心水嘅車牌亦可。

出入平安自求多福

玄學嘅嘢，信不信由你，但行車安全就係每位駕駛者應盡嘅義務，最緊要係以路路平安作大前提。負責任嘅駕駛者，除咗要定期為車輛檢查，確保機件運作正常，正確嘅駕駛態度與習慣都很重要，例如經常多望後鏡及側鏡；出路口或切線前應先着咗轉向燈及左顧右盼，安全之下才切線；切忌超速、酒後或藥後駕駛；時刻保持雙手揸軚；落雨、天陰、大霧，或者喺室內停車場，都要記得開頭燈及尾燈，讓自己清楚前方路況之餘，亦令其他道路使用者，尤其是迎頭或尾隨車輛可憑燈光確知你嘅位置。