正如某個商場電視廣告所講︰「心情好，買鞋；心情唔好，買鞋」，對我哋呢班玩具精嚟講，一年365日都係入貨時，就算農曆新年都唔會忍到手，今期經過尖沙咀海港城嘅玩具反斗城嘅話就更難幸免，事關Tamashii Nations喺度擺特色展覽，當中以《聖鬥士星矢》為主角，但凡選購「聖衣傳說」、「聖衣神話」或「聖衣神話EX」產品1件，就可獲贈紀念品一份。乜嘢紀念品咁巴閉，就係迷型黃金聖衣模型，款式有射手座、雙子座、天秤座及處女座四款，每次送一款，款式隨機而定，講明先，活動日期只係去到3月31日，而且贈品數量有限，送完即止，有心人要把握機會了。

今次嘅星矢紀念品換購活動屬於「期間限定」，只係去到3月31日，現時主力於玩具反斗城舉行，稍後還會延伸至其他大型商戶。

迷型射手座模型

迷型天秤座模型

迷型處女座模型

迷型雙子座模型

Robot魂Nu Gundam Psycho Frame Ver.　$499.9

Robot魂一向少滲線，Psycho Frame Ver.破例做番晒。

全身多處都有透明綠設計，展現Psycho Frame嘅發動效果。

隨盒其中一款造型手掌，緊握沙煞比嘅球形駕駛艙，模仿《馬沙之反擊》嘅最後一幕。

武器附件與普通版一樣，除咗有激光槍、盾牌及飛翔炮，當然唔少得火箭炮及激光劍。

同場加映Nu Gundam特別版

除咗星矢，Tamashii Nations仲預埋高達份，同步準備咗Robot魂Nu Gundam Psycho Frame Ver.，呢款特別版與普通版嘅最大分別，係裝甲加入透明綠嘅配色設計，營造Psycho Frame發動時嘅效果，而且白色位置用上珍珠白，又加入滲線元素，比起普通版更為隆重，高達迷見到很想要吧？留意呢款特別版只於玩具反斗城展覽場內獨家發售，而且銷售期比星矢仲短，只係去到3月2日，有買趁手！

查詢：2433 1828（瑞華行）