笑住過初四 好Game咩都有
雖然明天要返工，但又唔使苦口苦面，嚇走好運就唔好啦！假期最後一日，當然要開開心心過埋佢，如果之前出街玩得太盡，不如趁今日安安靜靜留喺屋企玩iPad Games；其實現時手機、平板遊都有好多創意遊戲，羊年有排玩！
每局遊戲不過十來分鐘，節奏緊湊。
遊戲以《魔獸英雄傳》角色設計卡片，最新更推出《哥哥打地地》資料片。
要建成一個繁華城市真係唔容易，夠大家有排玩。
要透過攻佔朋友島嶼賺錢，又要防範其他海盜搶錢，玩落都確實幾忙！
又唔使「年初四」咁嘅樣！咁多Game，有排玩！（設計對白）
玩法係以「視覺錯覺」效果連結看似「不可能」嘅橋樑。
改版「被遺忘的海岸」加入多種好玩新元素。
光源前嘅爛銅爛鐵原來可投影出兔仔，呢個係第一版Tutorial，難度極低。
到底可轉出乜嘢物件影子，小記暫時都未有頭緒。
喺遊戲入面所得到嘅鑽石，可以用嚟升級兵仔嘅能力。
玩法跟一般轉珠遊戲差唔多，儲滿蛋糕可發動胖公主攻擊。
策略致勝
《爐石戰記》
卡牌遊戲一玩就停唔到手，以《魔獸英雄傳》角色為主軸嘅《爐石戰記》就係例子，一推出就好受歡迎，靠唔同卡牌組合擊倒對方。最近遊戲更加入首個資料片《哥哥打地地》，可以應用到大量古靈精怪嘅機械手下卡片，提升遊戲趣味及戰術變化，就算要畀少少錢先買到呢個資料片，但由於可以有排玩，新正頭唔爭在啦！
下載費用：免費
《SimCity BuildIt》
估唔到喺流動裝置玩《SimCity》，都可得到電腦版差唔多嘅效果！《SimCity BuildIt》呢款免費遊戲，可一嘗當市長癮，建設心中理想城市。操控方面比電腦版簡單，由興建建築物到生產零件，都可以輕易經由Drag & Drop及點選。雖然唔課金的話，開啟各項要素嘅時間都比較耐，好在只要有心慢慢建設，都可以建立人人平等、均衡發展嘅城市。
下載費用：免費
《Pirate Kings》
遊戲開宗明義就係扮演海盜，要一手建設自己嘅島嶼外，仲要瞄準最富有嘅海盜，搶佢哋嘅財產，再升級島嶼設施。遊戲係同真實玩家透過Facebook連結一齊玩，即是話你又要搶朋友錢，又要防海盜朋友搶你錢，而且每個鐘頭都可以轉吓輪盤賺錢，可以長期Keep住玩。不過記住遊戲內財富只係虛擬，唔好跟現實朋友傷感情就得。
下載費用：免費
腦力鍛煉
《紀念碑谷》
呢款大玩「視覺錯覺」概念嘅創意遊戲，剛剛得到2014年Apple設計大獎，總共售出二百幾萬套。遊戲玩法係靠轉動橋樑，將公主安全運送到指定地方，玩法別樹一幟，相當考大家腦力，一玩上癮。最近推出改版「被遺忘的海岸」，再加入可將柱子扭曲90°嘅新奇有趣元素，拆一封利是就買得到！
下載費用：$28
《Shadowmatic》
用手扮出兔仔、蛇、雀仔嘅影子把戲，可能大家小時候都玩過。呢個新款創意遊戲App《Shadowmatic》玩法都係差唔多，不過唔係用手，而係將光源前睇落雜亂嘅物件扭轉成為每關所要求嘅物件影子。以為冇乜難度？因為物件一來巖巖巉巉，每關又冇特別提示要轉出咩形狀嘅影子，只靠畫面下方即時顯示嘅相似度去調校扭曲角度，仲要限時限刻完成，難度都唔低，非常襟玩。
下載費用：$23
無限轉珠
《Fat Princess：Piece of Cake》
Fat Princess（胖公主）之前喺PS平台上吸納咗好多Fans，今次轉移到iOS平台推出嘅《Fat Princess： Piece of Cake》都係大家常見嘅轉珠加RPG元素，有趣在除咗可以靠前面嘅兵仔作遠近距離或炮彈攻擊外，轉到足夠嘅蛋糕數目後，更可召喚隱藏喺戰鬥團隊背後嘅胖公主跳出嚟壓扁對手，非常搞笑。
下載費用：免費
《多啦A夢道具大暴走》
「叮噹可否不要老，伴我長高。」今日叮噹已經變成多啦A夢，不過百寶袋依舊，新推出嘅《多啦A夢道具大暴走》就以奪回畀外星人搶走咗嘅百寶道具為題，玩法唔算有新意，要喺限時內將同色同形狀人物或「叮噹」串埋一齊使用Combo攻擊，跟時下轉珠遊戲差不多。而遊戲勝在有「保全叔」嘅提示語音，絕對可以加分。
下載費用：免費
