今日係大年初二，維港喺晚上會舉行煙花匯演，想趁之前嘅空檔，同屋企人遊車河，順道行大運，何謂大利方位？現在就由玄學家林炳南師傅教大家搵，原來乙未羊年嘅大利方位喺正東方，出發後朝東而行，就有助增加運勢，路程細節即刻話你知！

啟德郵輪碼頭公園設於碼頭頂層，在此可以欣賞日落和港島東區景致。

被視為本港新地標的啟德郵輪碼頭，實為行大運時必到景點之一。

若想居高臨下欣賞清水灣沿岸景致，大可從停車場旁邊小徑登上龍蝦灣郊遊徑。

清水灣郊野公園內設有多個燒烤場地，讓大家BBQ眾樂樂一番。

公園外設有大量免費車位供遊人使用，認真方便。

泊車後沿指示牌的方向拾級而下，約3分鐘步程便到達「大廟」。

佛堂門天后古廟早於南宋理宗時期已經建成，為本港法定古蹟之一。

廟前誠心參拜，祈求天后娘娘保佑羊年事事順境。

玄學家林炳南指羊年大利方位在東方，朝東而行可生行大運之效。

根據林師傅所講，源於一白星飛臨，乙未羊年嘅大利方位喺東方，今日遊車河應向此方向出發，至於出發吉時為午時及未時，即係上午11時至下午1時，以及下午1時至3時，如果車身顏色係藍、綠、黃、杏、啡其中之一，催運效果更佳。此外，林師傅亦建議大家將起點定於旺角，皆因接近全港嘅中央位置，正好迎合中宮係乙未羊年大利事業嘅方位之說，為事業更添好運來。

郵輪碼頭風調雨順

與日產Qashqai由旺角向東而行，可取道觀塘方向嘅一段太子道東，經過彩虹邨後靠右上橋越過九龍灣工廠區，至九龍灣國際展貿中心左轉，按路牌指示接承豐道，就會到達本港新地標之一嘅啟德郵輪碼頭。承豐道係昔日啟德機場跑道嘅一部分，改建後成為今日嘅跑道公園，沿途可以欣賞九龍東部沿岸嘅過去發展面貌，以及緬懷昔日飛機喺啟德機場升降嘅盛況。隨後泊車於碼頭停車場，繼而登上設於頂層嘅啟德郵輪碼頭公園，一邊漫步，一邊讓港島東區景致映入眼簾。

啟德郵輪碼頭停車場收費

周一至周四：$8/小時

周五至日：$12/小時

網址：www.kaitakcruiseterminal.com.hk

查詢：3465 6888

啟德郵輪碼頭公園

開放時間：7:00am-11:00pm

獨佔鱉頭龍蝦灣

沿路折返九龍灣工廠區，可依路牌指示經觀塘繞道前往將軍澳隧道，過隧道後經寶順路、寶寧路、影業路接清水灣道往清水灣郊野公園方向而行，附近設有大量免費車位，又有多組燒烤爐及野餐設施，旁邊多條小徑更可通往園內各個景點，其中一條直達大草地，最適合小朋友喺度發洩精力，大人就可以倚欄眺望海景。清水灣郊野公園嘅另一端係龍蝦灣郊遊徑，拾級而上，就可居高臨下欣賞附近嘅郊外景致，新正頭心曠神怡一番。

拜大廟心想事成

新正頭，拜神祈福係常識吧！近近哋，一於去大廟灣嘅佛堂門天后古廟。揸車至清水灣道接連大坳門路嘅迴旋處，左轉入大坳門路，至清水灣鄉村俱樂部門前靠右泊車，隨後拾級而下，約3分鐘步程便到。呢間被當局評為一級歷史建築物嘅佛堂門天后古廟，早於南宋理宗時期已經建成，係現時本港眾多天后廟中歷史最悠久、規模最大，故有「大廟」之稱。廟宇建築充滿古風，分成正殿及左右兩個偏殿，供奉咗天后娘娘之餘，仲有金花娘娘，據講喺度拜神祈福特別靈驗，試吓無妨吖！

汽車查詢：2803 5333