送舊迎新換機水位情報

大掃除都關手機事？當然唔係叫你抹吓個芒，剷吓Apps咁簡單；索性趁新年，換部新手機啦！新款手機大把好選擇，揀啱心頭好之同時，記得拎埋部舊機出去Trade咗佢，少則賣到幾百蚊、多則有四位數字，用嚟幫補吓就最好不過，究竟「先達」家陣咩水位？即刻報料！

「先達」手機店眾多，唔怕麻煩可以逐間格價，隨時有意外收穫。

Samsung Galaxy E7 $2,898（a）

isai VL LGV31 $4,380（b）

部分手機參考回收價：

G-World Mobile老闆Lo哥
Lo哥話近期最多人買嘅都係iPhone 6、6 Plus以及Galaxy Note 4，其中iPhone 6銷量多少少。

SmarTone「惠你轉計劃」手機優惠價：

衛訊除咗提供「Trade-in價格3天保證」外，仲可以即場幫用家將舊機資料過落新機。

送走舊手機，最直接嘅方法就係去手機集散基地旺角「先達」。小記就拜訪場中星級人馬、G-World Mobile老闆Lo哥，查探吓二手手機回收價。原來目前歷史久遠嘅iPhone 4，都依然值$400至$500，比較新啲嘅iPhone 5s回收價更高達$2,300至$2,500，價錢相當硬淨。Android方面，Samsung Galaxy Note 3、LG G2分別賣到$1,900至$2,000以及$900至$1,000。行有行規，回收手機時，店員都會檢查各項功能係咪正常，好似聽筒、咪高峰Work唔Work；鏡頭有冇光哄、死點。近期比較常見毛病就有壞Wi-Fi，以及屏幕有俗稱「烙印」嘅痕迹，有的話就分別扣$300至$500不等，自己知自己部機咩事，事先有個預算。

Samsung Galaxy E7 $2,898（a）

屬中階手機，備有5.5吋Super AMOLED屏幕，色水夠鮮艷，仲配備RGB色彩感應器及屏幕調校功能，顯示效果超好。另外，佢有500萬像素前置及1,300萬像素後置鏡頭，配合廣角自拍模式，自拍合照冇難度。Galaxy E7仲支援雙卡雙待兼中港4G及3G網絡，北上公幹啱用。

isai VL LGV31 $4,380（b）

屬大熱水貨機LGL24嘅升級版，外形、規格都同LGL24相近，有黑、粉紅、粉藍三色可揀。規格方面，就備有5.5吋2K解像度屏幕、Qualcomm四核心處理器，並可防水防塵，亦由2GB RAM提升至3GB RAM，玩Multi-Tasking爽快啲。

Asus ZenFone 5 $1,499（c）

全新紅色版本，充滿新年氣氛。此機性價比頗高，內置四核心處理器、2GB RAM以及8GB ROM，而且兼容本地4G Cat 4制式，功能齊備。另外，佢備有800萬像素PixelMaster相機，夜拍效果唔差。依家買機仲送埋原裝皮套，千祈咪錯過。

AQUOS CRYSTAL X 各$6,380（b）

日本水貨機，賣點一睇就知係大玩超窄邊框設計，5.5吋屏幕佔機面表面積達84.4%，有型有款。本身機能都唔差，用Snapdragon 801處理器，有2GB RAM同埋1,310萬像素鏡頭。

連鎖店有得揀

如果唔想去「先達」放機的話，其實大型連鎖店都有得Trade-in，好似豐澤就繼續推出「6換9」計劃，可以用Notebook、MP3播放器、手提攝錄機、手提遊戲機、手機、相機Trade-in同類產品之外，仲可以換購電視、洗衣機、雪櫃等家電。而衛訊就有「Trade-in價格3天保證」，報價之後，畀你三日時間備份舊機先Trade-in，期間回收價保證不變，都好貼心。

電訊商有優惠

電訊商不嬲都有Trade-in服務，不過價錢向來比其他連鎖店以及「先達價」低啲，好似唔多吸引喎！最近SmarTone就推出「惠你轉計劃」，客戶只要簽約12個月並選用$316 6GB數據或$456 10GB數據計劃，即可於一年內以優惠價一買一換手機，而且仲可以扣減埋舊機嘅回收價。可供換購嘅手機不乏最新型號，好似可用$6,798換購原價$7,498嘅Galaxy Note Edge，又或用$4,398換購原價$5,998嘅LG G3，相當抵玩。