拍住Countryman上水甜蜜遊

明日就係214，想氹另一半開心？有人送99支紅玫瑰，再相約食情人節大餐，Sweet唔Sweet就見仁見智，但「肯肯定」唔Organic囉！若然玫瑰變成有機士多啤梨，情人節大餐就變做有機Dessert Tea，Sweet得嚟又夠新意。今趟我哋就與MINI Cooper S Countryman ALL4拍拖到上水，先摘有機士多啤梨，再到區內一間浪漫滿載嘅咖啡店歎有機Dessert Tea，Sweet爆！

鮮紅欲滴嘅士多啤梨，又大又甜又多汁。

依家到三月底都係士多啤梨嘅當造期，園內收費每磅$70。

店內露天茶座區嘅牆身，畫有一個寫上唔同語言嘅「我愛你」大紅心，係情侶嚟到嘅必影位。

「心花怒放」（前）、「愛的抱擁」（後）。

咖啡店樓底夠高，牆身仲畫滿咗感人嘅愛情故事。

Sharon與George這對夫妻檔，女的負責炮製甜品，男的煮咖啡，恩愛得羨煞旁人。

車尾標準置物量為350L，收起後排可以擴充至1,170L，點只V Day，農曆新年掃年貨都幫到手。

MINI Cooper S Countryman ALL4
車價：$455,800起　查詢：3193 6800（MINI HK）

入上水過情人節？唔係啩，同啲水貨客爭路，攞苦嚟辛咩？無錯，上水嘅市中心及旺區一帶的確已經淪陷，不幸中嘅大幸係郊區邊陲仲有淨土，例如天光甫嘅有機士多啤梨園，佔地約三萬平方呎，場內設有免費泊車，揸車嘅話可由粉嶺公路上水出口，經上水交匯處出粉錦公路，再於第一個燈位右轉入青山公路（古洞段），沿路直駛至穿過橋底（往古洞方向）不遠處，士多啤梨園就喺右邊出現。

田園氣息＋法式風情

據園主劉太表示，由去年12月至今年3月底，都係士多啤梨嘅當造季節，園內就種咗近萬棵法國品種嘅有機士多啤梨，配合區內嘅清新空氣，每粒熟透咗嘅士多啤梨，都又大又紅又鮮甜。園內唔收入場費，至於摘咗嘅士多啤梨以磅計，每磅收$70，情侶一場嚟到，雙雙落田，一邊採摘一邊Selfie，影低甜蜜回憶，摘完仲可以即場將士多啤梨洗乾淨，即摘即食分外Sweet。

離開士多啤梨園，下一站係上水舊墟嘅Cafe Je T'aime。由天光甫駕車前往，可沿青山公路（古洞段）南行（往上水方向），左轉出粉錦公路，經上水交匯處第二個出口出寶石湖路，然後直駛，跟住先右轉寶運路、再左轉新豐街，將座駕泊喺附近嘅露天停車場或咪錶位，步行約兩分鐘即達。Je T'aime乃法文，意思正即是「我愛你」，小店樓底夠晒高，牆上仲記載咗段段愛情故事，而店內嘅一杯一碟，都瀰漫住法式浪漫情懷，老闆娘Sharon仲專登為咗情人節，以當造嘅有機士多啤梨入饌，設計出「愛的抱擁」及「心花怒放」兩款冧盡有情人嘅特色甜品，配埋老闆George煮嘅玫瑰拉花Latte及玫瑰花茶，V Day絕配！

V Day禮物︰收起後排

今次陪住我哋拍拖遊上水嘅MINI Cooper S Countryman ALL4，係MINI家族中目前最健碩嘅車款，賣相夠晒安全感，而且搭載咗ALL4四驅系統，Off-road能力出色，就算走入上水郊區都依然穩穩陣陣，包保Honey冇投訴。而且唔使收起後排，車尾都有350L置物量，點只99支玫瑰，放埋珍寶級毛公仔做情人節禮物都夠晒位擺；如果你份禮物再要大件啲，冇有怕，收起後排就可將置物量擴充至1,170L，反正V Day你都唔會畀人坐順風車，Keep剩兩個位，合情合理。