過年前最後召集愛車大掃除

年廿八自然要洗邋遢，除咗家居大掃除，陪你四出拜年嘅愛車都唔可以遺漏，而且唔係平日用水喉射濕、再落清潔液過水繼而抹乾咁馬虎了事，想徹底去漬，至少每年都要做一次認認真真嘅洗車兼打蠟，順便清潔埋車廂，全車內外大翻新，新正頭先唔會失禮人。

進行車身打蠟前，先要用膠紙封貼車身膠邊。

利用特製泥膠於車身輕推，就可徹底清除車身表面嘅鐵粉及瀝青碎屑，又唔會刮花車身。

車廂每個位置都做足除塵工夫，一絲不苟。

出動負離子空氣清新機，淨化車廂空氣，將各式細菌統統趕走。

應付絲絨座椅，就要用蒸氣處理，具有去污、消毒作用。

萬事得汽車土瓜灣維修中心經理李永智提醒車主，洗車時發現車身有污漬，最好先用清水浸軟污漬，之後再用軟布抹拭，可以減低刮花車身嘅機會。

必備三寶
微細纖維布 $68
由特厚雙面微細纖維組成，吸水力強，適用於一般清潔及拋光用途，而且有安全邊位設計，防止刮花車身。

輪胎保護液 $98
能令輪胎色澤回復光亮自然，並有預防老化作用，而且效果持久。

滋潤洗車液 $88
泡沫豐富，有助清除污漬，以及滋潤車身漆面，保持光亮滑溜。

雖然有人話新正頭唔好喺屋企掃地，以免掃走好運氣，不過洗車就唔同講法，林炳南師傅話初六、初八及初九都係吉日，唔怕洗車喎。

的起心肝去洗車，車身上嘅微塵、瀝青碎屑、金屬粉末，以至因雨水浸蝕嘅污漬以至黏附物，當然唔可以留低，呢個時候就要靠專用泥膠KO佢哋，仲要做埋打蠟起漬，工序看似簡單，其實每個Step都好講究，尤其是打蠟呢Part，冇專業儀器及熟練技巧，唔止事倍功半，隨時仲有反效果，老老實實，都係搵番專家代勞穩陣得多。Mazda香港代理宏益汽車就趁過年檔期，推出咗「Mazda Shine車身及車廂護理服務」，唔止萬事得車主，其他品牌型號都無任歡迎，實際上又包咩服務先？

Mazda Shine內外大翻新

Mazda Shine主要包攬三大清潔項目，分別係車身表面護理、全方位清潔及車廂負離子空氣淨化護理，由富經驗嘅專業人員，加埋專業器具處理，萬事得汽車土瓜灣維修中心經理嘅「李Sir」李永智說︰「首先，我哋會有專人用清水先將車身洗淨、抹乾，然後用特製膠紙將車身膠邊貼封，方便進行車身打蠟起漬程序，之後再用特製泥膠喺車身表面輕推，將鐵粉、瀝青等碎屑徹底清除，又唔會刮花車身表面，跟住輪到上粗蠟、用打蠟機喺車身研磨嘅程序，進一步拋光、起漬，最後輪到上幼蠟，將蠟膏均勻搽喺車身表面形成保護膜，令車身表面由暗啞回復光亮。完成車身工序後，就輪到車廂嗰Part，包括喺中控台、軚環及門壁等位置除塵，至於絲絨或皮革座椅，就要用唔同方法護理，最後用負離子空氣清新機淨化車廂空氣，咁先算大功告成。」Mazda Shine嘅服務期由即日至本月28日，收費依汽車引擎容積大小而定，2,000c.c以下嘅優惠價為$1,888（原價$2,688），2,000 c.c.或以上就收$2,388（原價$3,188）。