每年一度嘅「C3日本動玩博覽2015」，喺啱啱過咗嘅星期五開幕，我哋嘅on.cc生活台即日已經有片送上，吸唔吸引到你去朝聖先？咩話，星期五、六都唔得閒，去唔到？今日Last Day了，無論想參觀甚至掃貨，都要把握最後機會。場內唔只有Cosplay、玩具及動漫精品，尤其是要留意今屆首度參展嘅PlayStation，以及一年比一年多嘅本地玩具生力軍單位，整體水平絕對唔會輸畀日、美大廠，好似「Ultimetal」嘅變形金剛馬格斯，由噸位到細緻度，都正過Takara Tomy嘅MP系列，本地薑咁爭氣，你唔係唔去撐場支持啩？

「Ultimetal」繼柯柏文後出埋馬格斯，仲會設計專屬外裝甲，噸位比Master Piece更加大隻。

ES合金系列展出OVA《三一萬能俠 世界終結之日》 Getter 1（圖）及六神合體試辦，不過說好了嘅超獸機神仲未見影，唔好要我哋再等咁耐嘞！

六神合體

本地新進品牌BigBoysToys，展出Q版阿Ryu（左），以及監修中嘅阿Ken，街霸迷見到，雙目一定變成星星眼。

《天威勇士》及《百變雄獅》嘅經典機械人重出江湖，雖然好多仲係灰模試辦，已經令人興奮不已。

「魂Nations」率先展出本月推出嘅Monster Hunter G級變形雄火龍，除咗獵人形態，仲可以變身火龍形態。

喺日本熱播中嘅《高達G之復國運動》，Bandai展區就有大大部G-SELF高達造勢。

四月先有得賣嘅1/144 HG馬沙專用渣古Ⅱ（左）及GunTank先行量產型模型試辦，今屆C3有得先睹為快。

《機動戰士Gundam The Origin》攤位展出咗大量珍貴嘅動畫原稿設定，未睇片先興奮。

今屆大會邀請咗女神Kabby帶大家遊C3，介紹唔同攤位嘅精彩節目。

PlayStation提供買機禮遇，每日首50位惠顧PS4主機嘅買家，獲贈TORO限定主機殼。

參觀SEGA手遊《鎖鏈戰記》展區嘅話，留意Cosplayer出沒注意，記住影相留念呀！

本土篇 青出於藍抵撐

香港版嘅C3，點可以畀過江龍威晒？以本地品牌身份，喺日本賣個滿堂紅嘅Action Toys ES合金系列，就喺場內展出OVA《三一萬能俠 世界終結之日》嘅Getter 1，造型比之前嘅原著版Getter 1更加精緻，錯過咗嘅玩具迷，毋須飛去日本買中古品捱貴貨了。至於上文提及嘅另一款香港大作—「Ultimetal」馬格斯，唔只大隻、精細，有關方面仲喺C3宣布，正式推出時會跟埋專屬外裝甲，期待指數爆晒燈，更驚喜係佢哋會出埋《天威勇士》及《百變雄獅》嘅經典機械人，童年回憶返晒嚟！

高達篇 預告馬沙回歸

但凡同動漫有關嘅大Show，一定有高達份係常識吧！為迎接「Gunpla」高達模型面世35周年，有關方面喺今屆C3就以依家喺日本熱播嘅《高達G之復國運動》及《Gundam Build Fighters Try》，仲有即將放映嘅《機動戰士Gundam The Origin》為主題，劃分成唔同展覽區域，尤其是後者展出咗珍貴嘅動畫原稿設定，又從日本首度帶嚟1/144 HG馬沙專用渣古Ⅱ及GunTank先行量產型嘅模型試辦。另外，「魂Nations」合金玩具亦有大型專區，焦點落於本月推出嘅Monster Hunter G級變形雄火龍，以及G.F.F.M.C.系列嘅獨角獸高達2號機報喪女妖—命運女神（覺醒模式）等，無乜意思嘅，畀定心理準備你，勤力(才豆)利是囉！

電玩篇 PlayStation大送禮

PlayStation首次參與C3，當然嚴陣以待，場內就發表咗多款仲未上市嘅日系勁作，包括公開試玩嘅PS4《One Piece海賊無雙3》、《Dragon Quest Heroes》及《Final Fantasy 零式HD》，而《人中之龍0 誓言的場所》亦有精彩預告Show畀你睇，而且每日首50位Game迷於場內惠顧PS4主機或同綑裝，除咗送高達$1,000出機優惠外，仲會跟埋限定賀年版TORO PS4主機殼，以及20周年限定TORO杯套裝。至於手遊陣營同樣夠噱頭，今年SEGA熱爆遊戲《鎖鏈戰記》就進駐會場，提供試玩活動，又有Cosplayer搞氣氛，大家攞定手機隨時影相呀！

活動小資料

名稱：C3日本動玩博覽2015

日期：即日

時間：12:00nn至7:00pm

門票：$35

地點：香港會議展覽中心3號BCD展廳