無錯，Michael Bay唔拍又拍嘅《Transformers︰Age of Extinction》係贏盡票房，不過影評差強人意，無限量嘅植入廣告、刻意賺人仔嘅劇情編排，仲有強行拖長嘅節奏……難怪Rotten Tomatoes都毫不留情，大加鞭撻，我都好想同Paramount Pictures講句︰變形金剛「笨」唔係咁銅臭、咁俗不可耐！想搵番老變嘅童真，又唔想一而再重溫G1故事，好彩今年有新動畫《Transformers︰Robots in Disguise》可以頂頂癮，最驚喜係老朋友大黃蜂（Bumblebee）終於大個仔，擔正做主角喇！

(左至右) 瞬間變形系列大黃蜂$99.9
高速變形系列大黃蜂 $199.9
傳奇系列大黃蜂 $59.9
戰士系列大黃蜂 $149.9

戰士系列鋼爪$149.9

瞬間變形系列爆牙　$99.9

高速變形系列鋼鎖$199.9

戰士系列鐵腕　$149.9

新一輯嘅老變動畫，延續之前嘅美式漫畫風格，最大特色係隨住柯柏文（Optimus Prime）喺上一輯英勇捐驅，新故事就由大黃蜂上位，由佢作為隊長兼教練，率領新團隊喺地球再同狂派周旋。大個仔嘅大黃蜂，亦換上型英帥靚正嘅新造型，同元祖G1年代嘅Cute Look相比，完全係兩碼子嘅事。有新動畫，自然就有新商品，除咗有平衡度最高嘅「戰士系列」，今次仲新增「高速變形系列」及「瞬間變形系列」，至啱小朋友口味。

戰士系列玩味最高

先講「戰士系列」，定位類似以前嘅Deluxe Class，係今次新品之中最具造型美，可動性亦係最高嘅選擇。就以大黃蜂為例，唔只忠實還原大隻Look及跑車Look，Skin Head頭及微笑樣都做齊晒，隨盒跟埋透明藍嘅大劍，算得上係歷代大黃蜂之中最有氣勢嘅武器。至於關節方面，頭、肩、手肘、髖、膝統統可動，方便擺甫士。除咗大黃蜂，同系仲有鋼鎖（Grimlock）、鐵腕（Strongarm）及鋼爪（Steeljaw）；鐵腕及鋼爪屬於新角色，前者係博派嘅女戰士，不過無論機械人形態或者變成SUV警車，氣勢都唔輸畀其他鬚眉，至於鋼爪就係狂派新首領，個樣似足豺狼，Deluxe Class亦都跟到足。

新系列變形超Easy

玩變形金剛，變形過程愈複雜、愈精細，大朋友就愈鍾意，不過往往難倒小朋友。今次新增嘅「高速變形系列」及「瞬間變形系列」，變形過程簡單到你唔信，就以「高速變形系列」為例，Size比「戰士系列」更大，就以大黃蜂為例，高約20cm，比「戰士系列」高約8cm，不過只需三個步驟便可完成變身，比「戰士系列」的七個Steps簡單得多；「瞬間變形系列」就更Easy，一個Step就可變到形，完全冇難度，難怪Boxart都講明三歲以上就啱玩。除此之外，新系列嘅老變商品加入咗手機遊戲Gimmick，玩家只需下載專用App，之後掃描商品身上嘅密碼標誌，就可玩到專屬遊戲，咁搞法，各位老變迷咪好易變埋做低頭族？

查詢︰2738 8300（Hasbro HK）

遊戲參考短片︰https://www.youtube.com/watch?v=Tm3eUsxvyOc