重鑄金剛回憶 港產飛天鑽
回想70至80年代卡通片百花齊放，尤其是超級系機械人動畫，三間電視台都爭住播，當中有一齣人氣高到要播足兩次，佢就係《金剛飛天鑽》。當年先由佳視於1978年首播，佳視結業後到1982年由無綫重播，片名改為《磁力鐵甲人》，所以連主題曲都有李龍基及林嘉華兩個版本。呢齣卡通最出位係主角先嚟雙手擊拳，跟住變身改造人，翻觔斗變出好似西瓜咁樣嘅機械人頭部後，再用磁力將身體其他組件逐樣結合，認真破天荒。港產ActionToys近日宣布推出《金剛飛天鑽》合金玩具，仲要學埋當年Takara經典版本一樣，將Mach Drill裝喺背脊，致敬味道之濃，勁過榴槤！
ActionToys磁鋼合金《金剛飛天鑽》鋼鐵Jeeg
建議零售價：$780
拆嵌前臂換上火炮，加埋大腿曲腳組件，招牌式嘅單膝發炮甫士就傳神重現。
膝蓋後方關節設有可拆式蓋掩，拆走之後，小腿就可大幅度屈曲。
透過金屬球體關節與強力磁鐵結合，呢招合體設計，到今日依然令人津津樂道。
金屬身體有三節可動，而頭頸部分可做出抬頭動作。
換成雙手握拳造型，重現劇中射出磁力飛拳一幕。
ActionToys版本跟Takara一樣，設有原創背包Parts，可以將Mach Drill掛喺背脊。
塗裝功夫充滿懷舊Feel，如果雙目改用透明部件就更傳神。
磁鐵關節勝在任你胡亂裝嵌、發揮創意，相信你細細個都試過咁玩啦！
於1975年喺日本首播嘅《金剛飛天鑽》，講述改造人司馬宙翻觔斗變成鋼鐵Jeeg，對抗邪魔大王國。
Takara球狀關節人形玩具Magunemo，唔只係《金剛飛天鑽》，甚至被視為70年代動漫界磁鐵合體嘅創作源頭。
話說《金剛飛天鑽》講述身為考古學者、主角司馬宙之父得悉遠古邪魔大王國即將復活，其父死後就將自己嘅意識記錄喺超級電腦內，司馬宙得悉此事後，於是接受身體改造，變成「鋼鐵Jeeg」對抗惡勢力。縱觀70年代中期，日本推出過多齣採用磁鐵結合噱頭嘅機械人動畫，除咗《金剛飛天鑽》，仲有1976年嘅《陰陽電磁俠》及《太空小五義 哥頓》、1977年嘅《超人戰隊 無敵巴拉達》，原來磁鐵機械人嘅概念，源於玩具廠Takara嘅球狀關節人形玩具「Magunemo」，話說Takara利用金屬球體製作關節，連同內藏磁鐵嘅組件，任由玩家隨意組裝出唔同玩意，後來動漫大師永井豪覺得夠Gimmick，以此為靈感創作出《金剛飛天鑽》，而Magunemo系列日後就衍生出「微星小超人」，俱為一時佳話。
前車可鑑 用料比例最平衡
唔計最早期的Takara Magunemo系列，近幾年例如Bandai、CM's、Evolution Toys都相繼推出過《金剛飛天鑽》玩具，可惜喺磁鐵、合金及塑料比例上有欠平均，容易關節失衡企唔穩，例如Bandai合金魂版本就會甩皮甩骨、而Evolution Toys塑料太多令玩具輕磅無力。前車可鑑之下，ActionToys力求將金屬及塑料比例達至平衡，於主要受力處，例如身體及小腿採用Diecast製成，組件之間嘅磁鐵吸力超強，結合時紮實穩陣，配合腳掌底部加入膠墊，大大提升接地性。塗裝方面亦甚有水準，表面嘅烤漆色彩均衡，摸上手唔會邊薄邊厚，上色又冇明顯出界，唯獨頭部雙眼比較死板，如果換上透明組件，肯定醒目得多。
特製配件 背脊孭雙鑽
至於可動性方面，為咗解決磁鐵關節難以擺出大幅度嘅屈曲動作，ActionToys索性額外特製大腿屈曲造型換件，配合膝蓋後方關節嘅可拆式蓋掩，就可以接近「零穿崩」嘅效果，擺出單膝跪地等高難度動作。不過武器配件唔算多，只有一對大型「飛天鑽」Mach Drill，以及一支大炮，原著嘅飛馬、長矛、圓盾竟然欠奉。總算挽回些少分數嘅係同Takara一樣，背部備有原創組件，可以將Mach Drill裝喺背脊，就連宣傳Poster都專登Show埋出嚟，相信有玩過Takara版本嘅玩具迷見到，一定勾起童年回憶，格外有Feel！
©永井豪/Dynamic企劃
查詢：2390 9843
