HT《復仇》升級美國隊長挺得起

玩得Action Figure嘅人都係矛盾一族，口裏說不，身體卻很誠實，任憑你話Super Hero人偶出到滯，呢頭立定決心話唔買，轉個頭咪又係出一隻買一隻，唔通你訂咗《Avengers︰Age of Ultron》嘅Iron Man Mark XLIII，就會知足唔要Captain America咩？正因為咁，Hot Toys新版嘅美國隊長已經準備就緒現正開訂，個樣靚咗、件衫細緻咗，最重要係圓盾追加磁力Gimmick，一啪就可Key實喺前臂上。

Hot Toys MMS281《Avengers:Age of Ultron》1/6 Captain America
*圖片所示乃產品原型，與最後完成品或有少許分別。

頭雕似足Chris Evans真人，而且用咗罕見嘅斜視表情，有新意！

由左至右，將三代隊長一字排開，可見右邊嘅新版戰鬥服融合咗《The Avengers》版本（左）及《The Winter Soldier》「Stealth S.T.R.I.K.E. Suit」（中）嘅設計特色。

隨盒唔只有兩個頭雕，仲跟多一個頭罩。

身為復仇者四寶之一，膊頭梗係唔少得「Avengers」標誌。

腰間間紋以機械壓製，而且造到厚薄一致，抵讚！

圓盾背後加咗磁石，可以吸實喺特製嘅磁石手臂上。

軍Boot採用分件處理，提升靈活性，可惜依然未夠貼身。

胸肌加操當堂Man晒

心水清嘅「復仇」粉絲，相信已經喺新Trailer見到美國隊長又有新造型，不過今次唔係大改，設計上有點似Golden Age Version嘅少改款，剪裁繼續以特別嘅車線縫製而成，肩膊及腰位有精細嘅凹凸紋理，明顯分別係心口嘅五角星標誌多咗一道紅藍色胸線，再延伸至兩邊膊頭，感覺Detail咗。另一方面，筆者喺討論區都睇過有玩家出Post，投訴舊作胸口太平，未夠Muscle Look，今次HT特別幫隊長「加操」，令心口兩件「雞扒」更加突出，同時又保持衣物嘅貼身性及延伸性，配合素體嘅30個關節，舉臂掟盾等動作都應付自如。不過有讚亦有彈，今次個素體好似矮咗啲，正式推出時增高番少少就Perfect。

圓盾加料振振有「磁」

頭雕方面，一直以來HT嘅美國隊長神似度都令人滿意，今次亦冇跌Watt，由王牌組合Yulli與JC. Hong分別負責雕刻及上色，五官輪廓似足演員Steve Rogers之餘，最重要係今次有齊全相及面具兩個Look，前者仲罕有用咗斜視表情，夠晒新鮮感，難怪連外國玩家都讚佢係「Best Cap Ever」！配件方面，同隊長形影不離嘅圓盾，今次唔只落重本用合金製作，手挽位仲加咗磁石，只要換上特製嘅磁石手掌，就可以將盾牌吸實喺手臂上，貼合戲中造型，亦比以前皮製手挽耐用、結實，一定程度上亦抵銷咗金屬盾牌太重令手臂唔夠力舉起嘅問題，從此唔再怕隊長「不舉」，振臂高呼嗌埋位！