YouTuber打機一拍成名
打機拍片掟上YouTube冇前途？瑞典「PewDiePie」打機頻道訂閱人數超過3,400萬，去年收入有成260萬英鎊！香港都有好幾位明星級電玩YouTuber，Fans數以十萬計。想成為星級打機YouTuber嘅機會嚟喇！Xbox剛舉行名為「Xbox遊戲YouTuber片王爭霸戰」，隨時一拍成名，仲有機會贏取今年6月E3遊戲展之旅添！其實，女仔YouTuber打機都唔輸蝕，今次就找來新進女子YouTuber「易劉」同Ducky Duck試玩新Xbox One遊戲，同埋分享拍打機片心得。
左起：Creamy@易劉、Jackie@易劉、Ducky Duck
有追開「易劉」片都會知佢哋之前都有玩《LOL》，打起機上嚟都駕輕就熟。
其YouTube頻道係：www.youtube.com/user/yicklauhahaha
《ScreamRide》
如果正正常常玩，可以在臨駛出藍色區域時掣儲氣，之後仲可以加速添。
非正常玩法是加速但不控制方向，將隊友衝晒落海！
再激啲的話，可以專登將過山車衝向建築物撞塌成棟樓。
「Demolition」保齡球模式可以瞄準建築物盡情破壞。
過山車隊友變身白老鼠任大家玩。
「易劉」嚟緊將會拍《Kinect Dance Central Spotlight》打機短片。
Ducky Duck平時都有玩開Console Game，唔知之後拍《GTA V》會有咩火花呢？
Ducky Duck YouTube頻道係：www.youtube.com/channel/UC8z2eDj_qg7HGnbjz0v-fZA
《Ori and the Blind Forest》
遊戲講述孤兒主角Ori挽救家園的故事。
遊戲以手繪風設計，畫面好有仙境感覺。
可以利用光球「Sein」攻擊。
柔和畫面加上悠揚音樂，玩得非常Relax。
Games Effect將會拍攝《Evolve》片，左邊嗰位是Pixel。
Games Effect頻道：www.youtube.com/user/GamesEffect
《Evolve》
Kraken識得飛天兼使出多種遠距離攻擊。
「撤離」戰共設有五回合，隊友之間可投選關卡的玩法模式。
遊戲共設有12名分成四類職業的獵人出戰，每個角色都有各自的武器及獨特招式。
想打倒巨獸，就要靠各隊友分頭包抄夾擊。
Hins（YouTube頻道：www.youtube.com/user/arearehin）
《Fable Legends》
Tony@宅男俱樂部（YouTube頻道：www.youtube.com/user/tonyyim222）
《Forza Horizons 2》
打機片YouTuber王「PewDiePie」
「Xbox遊戲YouTuber片王爭霸戰」
YouTuber達人拍片錦囊時間表
「Xbox遊戲YouTuber片王爭霸戰」比賽已經啟動，大家只要根據大會要求，拍指定十隻Xbox One遊戲打機片，包括：《Sunset Overdrive》、《Forza Motorsport 5》等，並於3月22日之前報名及上載到YouTube就可以參賽。大會請來著名網絡遊戲影片製作人屎萊姆、達哥、宅男俱樂部成員同Game Effect成員擔任評判，冠軍可以贏得2015年E3之旅！如果暫時腦閉塞冇乜頭緒的話，Xbox每星期都至少會邀請一組YouTuber拍攝不同遊戲片，大家可以從中參透玄機。
「易劉」：玩《ScreamRide》可尖叫減壓
由Creamy同Jackie組成的「易劉」係新進YouTuber組合，就算未訂閱她們的YouTube頻道及Like其Facebook，都應該睇過她們在熱爆「購物」MV中的舞技，兩位遲吓仲會拍攝《Kinect Dance Central Spotlight》影片同大家分享。今次佢哋主要係試將於3月初推出的Xbox One遊戲《ScreamRide》，這隻係會玩到大家尖叫的過山車遊戲，不過大家可能會問，畀你自己設計賽道同操控過山車有幾特別？實情遊戲精髓係盡情破壞，要玩到過山車衝出路軌、跌落海或者撞塌高樓大廈，難怪「易劉」二人玩到「哇鬼叫」。遊戲入面仲有個模式叫「Demolition」，要高速旋轉車廂，然後儲氣，好似保齡球般撞散建築物，玩法相當瘋狂。Creamy話自己係超級破壞王，好啱宣洩壓力！如果大家想睇佢哋點玩，同玩得有幾開心，記得上on.cc生活頻道睇片！至於「易劉」又點睇打機片？佢哋話：「最緊要係拍Game Play時要有個人風格，好似我哋鍾意嘅達哥就既搞笑又親民，而且仲好Enjoy個遊戲！」達哥確實迷倒好多少男、少女喎！
《ScreamRide》INFO
類型：策略模擬
開發：Frontier Developments
推出日期：3月5日
售價：待定
Ducky Duck：治癒系《Ori and the Blind Forest》舒服小品
同係新進女YouTuber，Ducky Duck打機經驗就較為豐富，平時有打開Console遊戲。採訪當日就試玩於3月推出的動作冒險遊戲《Ori and the Blind Forest》。其實近期都好興一啲治癒系小品遊戲，即係以簡單易玩、畫面優美，仲有舒服悠揚配樂的遊戲，《Ori and the Blind Forest》就係其中一款。遊戲講述一名孤兒要憑勇氣面對黑暗對手，挽救家園，表面睇似3D橫向捲軸遊戲，但亦加入唔少角色扮演遊戲元素，如加入技能樹系統。隨遊戲進行，主角會學到愈來愈多能力，可以透過三條技能樹升級角色。攻擊系統主要使用攻擊光球「Sein」，只要按X掣就可射出光球，更會主動追住敵人。Ducky Duck試玩遊戲中段，遇到少少麻煩，不斷被火球阻擋，跳唔到上去，好在遊戲加入Soul Link系統，只要儲滿一個能量球，即可按B掣存檔，無限Continue都仲得。
Ducky Duck認為：「男仔最好學識玩呢個遊戲，當女友打機遇上困難時可以出手襄助。至於拍打機片心得，最緊要講嘢夠鬼馬同有故事性，拍賽車遊戲時，可以畀啲古仔同角色設定佢哋。」Ducky Duck嚟緊仲會拍段好Hardcore的《GTA V》片，到時就會知有幾鬼馬喇！
《Ori and the Blind Forest》INFO
類型：動作冒險
開發：Moon Studios
推出日期：3月11日
售價：$119
Games Effect：《Evolve》人獸大混戰
即將推出的射擊大作《Evolve》都係交畀今次YouTuber片王比賽其中一組評判、Games Effect的Pixel介紹：「《Evolve》遊戲係由《Left4Dead》背後團隊開發，同一般兵捉賊式射擊遊戲唔同，遊戲分為獵人同怪獸兩派勢力，扮怪獸的玩家可以升Level追殺獵人玩家，玩法好特別。」《Evolve》在去年E3攞到不少最佳遊戲獎，四名獵人玩家與一名怪獸玩家對戰，獵人合力追殺怪獸的同時，身懷絕技的怪獸亦可以不斷升級反過來追殺獵人！雖然遊戲推出時只設有12名獵人同三隻超級怪獸Goliath、Kraken同Wraith可供選擇，不過廠方之後會以DLC形式加入新角色、新怪獸，應該可以有排玩。遊戲最特別係收錄名為「撤離」戰役模式，會以動態方式將各種地圖、模式、獵人同怪獸組合逐一展現，每關勝負都會影響下一關兩方勢力的強弱，總計有超過80萬種可能性。Pixel試過Beta版即讚賞不絕，目前最關心係遊戲有幾襟玩。Games Effect嚟緊二月底時會上載《Evolve》打機片，大家記得留意；Pixel仲話打機符碌成功或者失敗都唔緊要，最緊要係夠投入並以娛樂為主，自己玩得開心，機迷自然睇得開心。
《Evolve》INFO
類型：射擊
開發：Turtle Rock Studios
推出日期：2月10日
售價：$468
YouTuber分享拍片貼士
問題1：要拍一條吸引的打機片要有甚麼元素？
問題2：今年最期待的Xbox One遊戲是哪一套？
Hins（YouTube頻道：www.youtube.com/user/arearehin）
答1：其實最緊要投入遊戲，同埋要有個人風格，例如我就會開埋Cam拍自己，令到Viewer可以睇到拍片者的反應同表情。
答2：《Fable Legends》。本身有追開之前幾集《Fable》，鍾意佢自由度高，就算畫面唔算真係好靚，但好玩足以彌補一切。
Tony@宅男俱樂部（YouTube頻道：www.youtube.com/user/tonyyim222）
答1：拍片時唔好太過緊張，最重要是Relax。當然要有個人風格，同埋可以同Viewers有互動就最好！
答2：雖然《Forza Horizons 2》已經推出，不過不時都有新DLC推出，可以繼續玩。
打機片YouTuber王「PewDiePie」
講到打機影片YouTuber之王，就首推瑞典青年Felix Kjellberg所成立的「PewDiePie」頻道。其拍片風格幽默抵死，難怪截稿時訂閱人數已達到3,406萬，閒閒哋拍一條片都有幾百萬至幾千萬觀看次數，吸引到唔少贊助，一年吸金幾千萬港元，厲害！
「Xbox遊戲YouTuber片王爭霸戰」參加方法
想參加的話，記得在3月22日之前，將比賽要求的遊戲拍成短片並上載至YouTube，以及將影片連結及個人資料電郵至xbox@grandsky.hk。參加者可以無限次上傳參賽影片，冠軍可以得到E3之旅，其他得獎者都有機會得到影音產品等獎品。
網址：www.xbox.com/zh-HK/
查詢：3071 4868
