既然練跑都有Windbreaker，何解練波就冇？着住外套練波，怕「論盡」，連波都斬唔起？少年你太Outdated了，因為Nike啱啱推出咗專為足球而設嘅Revolution訓練外套，薄身同透氣程度，厲害過一般Windbreaker之餘，更特別注重膊頭、背脊、上臂等位置衣料嘅彈性，練波時再大動作，都唔怕扯住扯住啦！

除咗新科足球先生C朗拿度（圖），巴塞嘅恩尼斯達及阿仙奴嘅韋舒亞都試着過Nike Revolution，型到冇朋友！

恩尼斯達

韋舒亞

Nike Revolution Jacket $899/件

衣料本身已有高度透氣能力，腋下再以雷射切割方式加上氣孔，着住佢加操都唔會成身汗。

留意衫袖同衫身主體係分割式剪裁，令雙手可以自由擺動，快跑時就可以更高嘅擺手頻率，幫助自己加速。

Nike Football常見嘅圓點形直間條紋，用喺Nike Revolution嘅衫袖之上。

拉鏈位以融合熨貼方式製成，仲加埋外罩，以免跑動時因拉鏈左右晃動而影響衫身嘅貼身度。

金色版Mercurial CR7有冇得賣？暫時只知中國嘅nike.com有少量開售，香港未有消息。

閃令令嘅CR7標誌，原來內藏微型鑽石，使唔使咁誇呀？

唔只鞋面，就連原本銀色嘅銻釘都變埋金色，浮誇到呢！

天氣涼咗，練波着多件衫係人之常情，不過有時見到啲球員着住外套、衞衣嚟練波，總係覺得有啲臃腫，正如Nike Football全球設計總監Peter Hoppins所講︰「球員通常為咗避免身體受到束縛，而選擇尺碼過大嘅訓練外套，有啲球員仲乾脆唔着外套，因為佢哋唔鍾意額外嘅負重或變得臃腫。」

彈性內層隨意郁

既要擋風，又要稱身，Nike Revolution就應運而生，摒棄一切累贅設計，務求做到最輕、最薄，外觀就好似一件透明嘅Windbreaker，將裏面有顏色嘅背部、膊頭及上臂嘅可伸縮Engineered Mesh現晒出嚟，夠晒Eye catching之餘，最重要係Engineered Mesh嘅彈性十分高，令覆蓋到嘅位置都可以靈活擺動，讓用家無論拗晒腰練罰球，或者急停轉身等大動作，都可不受拘束，想做就做。除此之外，整件Nike Revolution無論內、外層物料都有透氣功能，而拉鏈位以融合熨貼方式，取代傳統嘅線縫，符合精簡、輕量化等設計原則。

Mercurial CR7鑲鑽致敬

要數球壇嘅當紅炸子雞，啱啱第三度當選世界足球先生嘅C朗拿度認第二，都冇人敢認第一啩！為咗向呢位球王致敬，Nike就加推咗金Boot版嘅Mercurial CR7。首先鞋面改用象徵榮耀、高峰嘅金色，不過並非淨色嘅土豪金，而係鞋身前段用金色，鞋領及鞋帶區就用黑色，兩色之間以變漸色融和，華麗之餘又有神秘感；最出位係C朗專用嘅特別版波Boot，Nike仲會破天荒以人手鑲嵌方式，喺「CR7」嘅標誌上鑲入微型鑽石，咁浮誇，相信普天之大的確只有C朗先Carry得到。

查詢：2388 3348（旺角花園街Nike Football）