臨近農曆新年，唔少人都心思思想換新嘢，手機應該係其中一樣必換Item；其實除咗一系列行貨機，都仲有唔少水貨機值得揀。最新大作要數聖誕檔期先喺北京推出嘅Huawei Honor 6 Plus，內置八核心處理器、3GB RAM之餘，最大焦點當然就係有一組雙800萬像素鏡頭，可以模擬出0.95大光圈嘅相片效果，今期必玩！

Huawei Honor 6 Plus
$3,280（16GB）
$3,980（32GB）

Honor 6 Plus機背用上玻璃纖維物料，帶有反光效果兼唔易跣手。

雙鏡頭設計，拍攝速度都好快。

右邊卡槽可以擺放nanoSIM或者microSD，用法靈活。

內置「SIM卡管理員」，可以設定預設數據網絡、通話等功能。

採用Hisilicon Kirin 925八核心處理器及內置3GB RAM，《Antutu》跑分高達44,338，屬旗艦級效能。

「大光圈」模式可以拍攝出F0.95至F16光圈效果嘅相片，拍攝後可以調校焦點及光圈大細，營造超誇張淺景深效果。

Docomo SC02F 各$2,080

isai FL LGL24 $2,280

Huawei Honor 6
$2,280（16GB）
$2,680（32GB）

美圖M2 $2,980

Sony SOL 26 各$3,480

Huawei Honor 6 Plus 雙4G啱外遊

小記上個月先喺北京現場直擊Honor 6 Plus發布，不過係玩測試機，今次真機上手，金屬機側、網格暗花兼玻璃纖維機背物料，設計同發布會所見嘅一樣，而手工亦好對辦，手感唔錯。今次水路到港嘅版本仲係最勁嘅雙4G版本，可以同時兼容內地聯通、中移動網絡，拎到返香港都照樣用到4G，速度夠晒爽。值得一提，機身僅有兩個卡槽位，其中一個擺放microSIM，而另一個就擺nanoSIM或者microSD，雖然用法夠靈活，不過變相用雙卡時就要犧牲擴充容量，有辣有唔辣！另外，此機嘅5.5吋全高清大芒色水自然，可視角極高，睇相、煲劇都好靚。

好玩大光圈

此機招牌功能係雙鏡頭設計，仲記得發布會上，廠方稱之為「平行雙八百萬鏡頭」，即係設有兩個800萬像素鏡頭，實測對焦速度確實好快，不過原來取景只係用其中一個鏡頭，用手指遮住另其中一個鏡頭都照舊可以拍攝；唯一影響就係當使用大光圈模式時，畫面會出「覆蓋鏡頭」提示，而且拍攝後亦唔可以重新調整光圈大小效果，何謂「平行」？我暫時睇唔透……此外，小記亦都試玩咗「超級夜景」模式，原理有啲似相機嘅長曝，手機會因應環境光暗將啟動慢快門，連超暗嘅環境都影到，唔似得一般手機咁硬谷ISO，相片雜訊自然少得多，影夜景一流，不過建議拍攝時最好搵平面、底座當三腳架咁借吓力，否則都好易鬆郁朦。價錢方面，內地定價¥2,499，水貨16GB及32GB分別賣$3,280及$3,980，都算抵玩。

其他抵玩之選：

唔介意用已推出一段時間嘅機款的話，就有唔少抵玩兼大劈價嘅水貨機，來自日本同內地都有，梗有一款啱你！

Docomo SC02F

此機又名Galaxy J，雖然係Samsung出品，不過外形超日系，仲有較特別嘅彩藍及粉紅兩色。佢採用Snapdragon 800處理器、3GB RAM及1,300萬像素鏡頭，可以話係細芒版Note 3。

isai FL LGL24

即係日版LG G3，同樣備有5.5吋2K屏幕，用Snapdragon 800處理器，不過RAM就會由3GB降為2GB，但勝在加入防水防塵功能。至於外形就同行貨G3完全唔同風格，圓角機身，加上拋光機背，日系味道濃。

Huawei Honor 6

正正係Honor 6 Plus嘅上一代，不過規格絕對唔輸蝕，採用5吋大芒、八核心處理器、3GB RAM，都係高階規格，但價錢就平得多！

美圖M2

賣相同功能都跟美圖手機2接近一樣，同樣有1,300萬像素前後鏡頭兼具備超強美顏效果；另外除咗純白、粉紅、淺粉紅色之外，仲追加薄荷綠新色，更加搵埋Angelababy做代言人，夠晒話題。

Sony SOL 26

亦即係日版嘅Xperia Z3，功能、設計同行貨完全冇分別，唯一唔同就係僅支援1,800MHz頻譜4G，上網速度會相對行貨慢少少；不過定價比行貨平超過一千蚊，點計都係筍！

查詢：3689 3565