睇戲都知，喪屍通常都係日頭匿埋，行動緩慢，到夜晚先至係Party Time！即將推出的喪屍遊戲《Dying Light》就用上這條橋。遊戲引入時間系統，喪屍群在日光日白下癡癡呆呆，但到夜晚即時Power Up，亂衝亂跳，甚至乎連樓都識爬，基本上一到夜晚玩家只得捱打，有乜風吹草動就要速逃！遊戲竅妙之處就係要在日頭搵多啲物資同道具，留番夜晚自衞，同班喪屍死過！

畀喪屍捉住，要盡快掙脫甩身，唔係就會變成喪屍們的點心。

半夜出街記得帶電筒，可以用來嚇一嚇喪屍，延長逃難時間。

一手持刀、一手揸槍，都未必可應付喪屍來襲。

日間雖然多喪屍，但佢哋行動能力低，要衝出重圍都唔係太困難。

遊戲過程中都會撞到其他幸存者，大家要夾手夾腳搵逃生之路。

PS4高清重製版畫面表現更仔細。 $157

製作力求盡善盡美

《Dying Light》是一套結合高速動作、大量喪屍及仔細畫面的射擊遊戲，開發小組為求做到盡善盡美，於是將面世時間由原本2014年年初延期差不多一年，亦都取消打算在PS3、Xbox 360上推出的計劃，因為嫌這些主機的機能有限，令遊戲表現不佳！以《Dying Light》今時今日可以做到1,080p的流暢畫面，一如《inFAMOUS》玩法同速度感，仲可以在同一畫面出現到好多面容猙獰的喪屍，其實等得耐少少都係值得！

白天搜羅物資及設陷阱

遊戲故事設定在土耳其城市Harran發生，玩家扮演調查員Kyle Crane，前往當地調查不明疫情爆發的原因。遊戲採用現時流行的開放式地圖設計，亦正如之前所講採用日夜系統，仲引入大霧、刮風同落雨情況，環境設計得甚具水準。白天時，喪屍仍然會在街上行來行去，但能力低，反應遲緩，正常情況下玩家都能夠合理地邊打喪屍邊搜索食物及道具，然後製作特別武器，並將僅餘的幸存者帶到安全地方。另外在日頭時亦都可以在要道上架設陷阱，到夜晚走難時就大派用場。

日長夜短有「良心」

一到夜晚，喪屍就變得非常進取，移動速度大幅提高之餘，亦會在伸手不見五指的環境下，從四方八面甚至識得爬牆狙擊玩家，大家捱唔捱得過夜晚真係睇彩數。不過開發小組都有「良心」，日夜時間分配不是跟現實時間，遊戲中日夜時間比例約為9:1，應該都夠時間畀大家擸定架生！除了單人模式之外，遊戲都設有多至四人的連線模式，除咗可以齊心協力圍剿喪屍之外，仲會有由玩家扮喪屍追人咬的模式，相信此模式會大受玩家歡迎。

INFO

類型：驚慄動作　

開發：Techland、WB Games　

平台：PS4、Xbox One

推出日期：1月27日　

售價：約$450　

查詢：2359 7998

同場加映：「生化危機」PS4高清重製版1,080p輸出

近期推出的驚慄遊戲，還有PS4版本的《Resident Evil HD Remaster》值得一玩，它跟之前推出的PS3版一樣，同以1996年推出的初代《Resident Evil》（Biohazard）為藍本再以高清重製。PS3高清重製版輸出為720p，而PS4高清重製版就進一步提升至1,080p/30fps輸出，在同一場景畫面對比下，PS4版會更加仔細，而且光源處理亦都較好，唔知各位生化迷又有冇興趣呢？

網址：asia.playstation.com