美國賭城拉斯維加斯每年一月都全城逼爆，皆因科技界年度重頭戲CES開鑼。是次展覽為期四天（1月6日至9日），新產品排住隊出場；今年焦點並非韓廠大電視機，反而係一部Laptop，所說的正是令眾人攞上手都會大叫「Amazing」、「Incredible」的Lenovo LaVie Z。此機雖然用13.3吋屏幕，不過竟然只得780g，擊敗坊間所謂輕巧型Notebook，可算係年度期待之作。除激輕筆電，Lenovo也推出多款手機、配件及平板電腦，樣樣都創新兼有睇頭。

Lenovo LaVie Z

LaVie Z HZ550只係重780g，非常輕巧。

LaVie Z輕到可以用兩指拎機，無花無假。

現場擺放的LaVie Z全部都印有NEC Logo，日本市場專屬！

新一代X1 Carbon外形同上代激似，最明顯分別就係改用番傳統Function Key。

X1 Carbon屏幕開盡後可以平放，方便Presentation。

ThinkPad Stack體積細細，但其實集齊四種配件的功能。

四種配件可獨立或配合使用，仲齊齊用上ThinkPad式設計，每個配件都設有磁石，可以不分次序組合。

ThinkPad Yoga 15設有多種擺放方式，相當方便。

特別採用了Intel RealSense 3D鏡頭，相信隔空操作等功能遲些就用到。

現場花絮
不同場館距離都幾遠，一定要靠會場Shuttle Bus，難免要排長龍。

除Shuttle Bus，場內仲有Golf Cart駁腳，唔使行到腳跛。

其他新品
VIBE FieBot為無線手機拍攝底座，可以透過藍芽遙控轉動拍攝角度，底部加埋小型三腳架就更方便。

VIBE Band係智能手錶，備有1.43吋E-ink屏幕，可以顯示時間，作通知提示，以及計算運動數據。

Lenovo推出New Glass，外形、功能都似足Google Glass，並可以扣在不同款式眼鏡上使用。

必須連同黑色電池及主機一齊使用，工作人員就話可以將重量平均分配到頸部承托，冇咁攰。

Pocket Photo Printer可以無線與手機、平板連接再隨時印相，機身顏色仲好搶眼。

VIBE X2 Pro設有1,300萬像素前置鏡頭，自拍有保證。

VIBE X2 Pro用上三層不同色的金屬組成，側面超特別。

Selfie Flash只需插入3.5mm插口即可使用，暫時淨係得VIBE X2 Pro兼容。

Yoga Tablet 2 AnyPen外形與上代8吋Yoga Tablet 2一樣，不過預載Windows 8.1而非Android。它支援AnyPen技術，鉛筆手寫超流暢。

P90備有5.5吋全高清屏幕，電量更達4,000mAh。

TAB 2 A7-30採用MediaTek處理器及1GB RAM，規格入門，亦備有定價更平的Wi-Fi版本。

LaVie Z HZ550僅重780g

提起輕巧電腦，一般人應該會諗起MacBook Air又或者不同品牌都有出品的Ultrabook。不過，從今日開始，你要答「LaVie Z」！此機是由Lenovo及日本NEC個人電腦合作推出，分別有HZ550及HZ750兩個型號，跟以往NEC「單飛」出品的LaVie Z系列一樣走簡約路線，機身並無花巧設計，最大賣點就係激輕機身，HZ550及較高階的HZ750分別只重1.72磅（約780g）及2.04磅（約925g），比起出名輕身、11吋或同樣13.3吋的MacBook Air系列還要輕一大截，打破輕巧電腦的固有印象。現場幾乎每位拎機上手的人士，都對此機的重量大表驚訝，女士甚至可以用兩指夾住機角手持，有圖有真相！規格當然不俗，HZ550及HZ750分別採用Intel Core i5及Core i7處理器，同是內置128GB SSD；分別在於前者不設篤芒，後者則支援，並且具備6cell電池，比起HZ550的4cell電池，續航力較優勝。

改版旗艦X1 Carbon

除全新LaVie Z系列外，當然少不了招牌ThinkPad系列。原來早前係ThinkPad系列賣出一億部的大日子，為隆重其事，廠方就推出第三代ThinkPad X1 Carbon。新機採用14吋2,560×1,440解像度屏幕，內置Core i7處理器，最大升級就係改用PCIe介面的SSD固態硬碟，令存取速度及運算速度更快，延續X1 Carbon系列旗艦級的定位。值得一提，上代Adaptive Keyboard似乎反應不太好，今代順應民意，用回傳統實體Function Key，用慣用熟，當然順手。另外，電池續航力亦大幅加料至10.9小時，夠長氣用半日。

Stack配件有心思

ThinkPad Yoga系列亦有多款產品推出，分別是12、14及15吋三款，繼承Yoga系列變形擺法之餘，15吋版本更特別備有Intel RealSense 3D鏡頭，視像通話時，可以將混亂的背景虛化，亦支援凌空手勢操作等功能，有驚喜！主機之外，ThinkPad亦推出了名為Stack的配件，它將藍芽喇叭、外置充電器、無線Wi-Fi盒及外置硬碟四大配件整合為一，而四件配件又可以獨立或者恍如砌積木般組合使用，好似喇叭加充電器就延長播放時間至48小時、Wi-Fi盒加硬碟就可以變身做無線硬碟，可以因應當時需要裝拆，有諗頭！

VIBE X2 Pro多花臣

至於新款手機要數P90及VIBE X2 Pro，兩機齊齊用上64-bit架構處理器及2GB RAM，應該屬中高階效能。當中以VIBE X2 Pro最多花臣，先講外形，機身是由三層不同顏色的金屬組成，正面睇不特別，打側睇就有層次，超搶眼；另前後置鏡頭都具備1,300萬像素，單講規格已經夠強，此外仲有專屬配件Selfie Flash，實情係一盞迷你Ring Flash，設有八顆LED燈，插入VIBE X2 Pro的耳筒位就用得，火力強，夜晚用前鏡頭自拍都夠光！平板電腦則有TAB 2 A7-30以及Yoga Tablet 2 AnyPen，前者係平價7吋機，規格入門；後者其實係8吋Yoga Tablet 2的升級版，改為預載Windows 8.1作業系統，而且支援AnyPen技術，即使是鉛筆或原子筆，都可以當手寫筆使用，記事、畫圖都方便。