健康在手
新年伊始，循例都要問吓大家2015年有甚麼願望。筆者同好多香港人有一個共同願望，亦希望身體健健康康，為理想繼續奮鬥！搭載iOS 8的iPhone 6內有M8動作感應協同處理器、氣壓計及《健康》應用程式（Health App），仲有好多對應的運動、健康程式，要「掌握」自己的健康狀況同埋運動量話都冇咁易，唔知各位iPhone 6/6 Plus機主又用過未呢？
即使未安裝其他應用程式，《健康》應用程式已可幫大家記錄步行或跑步距離、步數同埋上樓梯層數。
可因應不同的應用程式，從而自行修訂讀取及寫入各項類別的健康數據。
記錄資料都幾全面，不過如步行高度等資料，要Pro版先有得用。
圖表分析全面，可以方便地一覽各項運動量。
每日活動時間、消耗卡路里等資料非常詳盡，一目了然。
「Smart Coach」會不時提點你，猶如多一個朋友陪你玩。
有多項運動流程畀大家跟住做，亦可另外購入各種流程。
內置簡單影片教你做運動。
瞓覺時間有6.5小時，實際有效睡眠有88%，算唔錯啦！
可以揀選當日到底有冇做過運動、飲過酒精類飲品或工作壓力係唔係太大，令睡眠資料更準確。
設有簡單圖表顯示當日所攝取卡路里的成分。
可在日記中加加減減每餐餐單及分量，系統內已收錄三百萬種食物營養資料。
內置27種瑜伽動作練習，並用上美麗的圖畫帶領大家跟住做。
除可記錄所消耗的卡路里外，還能感測心跳率。
《健康》應用程式全面資料平台
整個健康系統核心部分是《健康》應用程式（Health App），打開應用程式後，下方會顯示出四個選項，包括「綜合統計」、「健康數據」、「來源」及「醫療檔案」，大家可以在「來源」一項揀選需要讀寫數據的應用程式，另外亦可以在「健康數據」中揀選想睇到的數據類別，如睡眠時間、心跳率、步行及跑步距離或者營養元素等等，可因應各人需要而在Dashboard上顯示出個人化的資料統計，而且計算步行距離、步數同上樓梯層數等全部由iPhone 6自動代勞，唔使另購裝置。
《Runtastic》自動讀入個人資料
《Runtastic》免費版可以從《健康》應用程式中讀取出生日期、性別、身高、體重等資料，唔使自己入咁麻煩。雖然免費的Lite版本好多功能都冇，如睇番跑步統計，只能以月份模式顯示，又顯示唔到全面的路線圖，不過試用完覺得啱用，再購買Pro版都未遲。
INFO 下載費用：免費、$38（Pro版）
《Up by Jawbone》虛擬教練陪你玩
之前藍色Icon版《Up by Jawbone》要配Jawbone自家智能手帶追蹤器使用，新出的紫色版本則是為iPhone 6而設，以手機做感應器，幫大家記錄每日運動量，又或是自己輸入飲食餐單或者睡眠時間等等。最抵讚係有虛擬教練「Smart Coach」不斷提點你同讚吓你，更可在排名榜上跟朋友鬥一番。
INFO 下載費用：免費
《7 Minute Workout》每日健身7分鐘
App Store上有好多「7 Minute」作名目的健身App，而這個由Bytesize開發的《7 Minute Workout》除提供一般以手機語音提示或以動畫、影片顯示的健身運動步驟外，更能對應到《健康》應用程式使用，將燃燒咗幾多卡路里的資料傳送到《健康》應用程式內顯示，方便管理。
INFO 下載費用：免費、$15（Pro Upgrade）
《Sleep Better》分析睡眠質素
點解瞓醒完仲攰過未瞓嗰陣時嘅？好可能係同睡眠質素有關。只要臨瞓時將iPhone 6接上電源再放在枕頭邊，然後在《Sleep Better》校定鬧鐘，一起身就有成個圖表，等大家知道有幾多時間係處於淺度同深度睡眠之中。程式仲可以輸入生活狀態資料，令分析更有參考價值！
INFO 下載費用：免費、$18（專業版）
《MyFitnessPal》卡路里大作戰
留意卡路里攝取，控制體重，對健康大有幫助。《MyFitnessPal》就係iOS卡路里計算應用程式中最好用的一個，其食物數據庫有超過三百萬種食物資料；而且仲可以跟其他健康程式連動，如從其他應用程式得到每日運動量或者體重資料，然後自行調整卡路里目標，如果邊幾日做得多運動，就可以獎勵自己吃多點美食！
INFO 下載費用：免費
《Pocket Yoga》快樂做瑜伽
《Pocket Yoga》是瑜伽練習程式，既有語音同美麗的圖畫指導大家進行27種瑜伽式子練習，每個動作的準確性、吸氣和呼氣時間都提示得清清楚楚，仲可播放iPhone內的歌曲做背景音樂，當有進步時更可以開啟新場景。佢仲可以感應心跳頻率同燃燒的卡路里資料上傳至《健康》應用程式。
INFO 下載費用：$23
