LG AKA交戲大眼仔
近年手機嘅設計同功能愈嚟愈無新意,唔係鬥芒大就係鬥規格。近日由韓國水路到港嘅LG AKA就唔同咁講,皆因此機用上廠商原創嘅四隻AKA卡通角色做主角;最搞鬼就係買機會送埋個半截式保護蓋,扣上機身就會顯示出一對大眼仔,呢對眼仔仲會交戲,有晒表情同反應,過癮到暈!
$2,880
會根據所屬角色,送你一隻小Figure,夾埋《Snapsh-OO-t》App,就可以玩到AR效果。
採用近年LG嘅招牌Rear Key設計,校音量及開關都喺晒機背。
插入耳機後,大眼仔就會跟住戴埋耳機。
雙喇叭位於機底,音量輸出都唔差。
半滑保護蓋就會顯示時間及通知提示。
介面比傳統設定較Young,亦同時內置AKA專屬Widget。
內置多款專屬鈴聲,同AKA手機嘅形象一樣,走活潑風格。
Widget提供《AKA Space》、《Snapsh-OO-t》等內容,用家仲可以參加唔同遊戲活動升級。
採用中階處理器,跑Benchmark分數就唔算高,幸好實際操作好流暢。
包裝盒設計亦見心思,仲附送AKA貼紙。
有大量保護蓋設計作品參考,各有特色。
保護蓋可以隨時拆下,亦可以扣於機背。
內置QMemo+,可以隨時記事、畫圖。
雙眼有好多變化,好搞鬼。
AKA系列手機型號叫F520,推出咗粉紅、黃、黑、白四色,原來分別係代表原創角色「YOYO」、「SOUL」、「WOOKY」同埋「EGGY」。筆者手上嘅測試機就係角色「YOYO」,機背蓋連同保護蓋都用上粉紅色,感覺相當Girlish。最好玩就係佢個半截式保護蓋,此蓋其實內藏晶片,套上機面之後,冇被遮蔽嘅屏幕部分就會顯示一對大眼睛,當用家掃動大眼睛時會眼仔睩睩、用手遮住眼睛就會瞇眼、揮動機身仲識得扮暈,好得意。除咗Gimmick,雙眼會根據手機使用中嘅功能而畀唔同反應,例如插耳機時就會戴上耳筒、充電時又會變成藍色。另外,每款角色都會內置一系列專屬嘅來電、通知鈴聲及主題;如用家更換角色嘅保護蓋,以上內容又會同時轉換,玩味十足。
大量專屬程式
當套上保護蓋時,來電、鬧鐘等介面會相應縮細,方便用家唔使滑開保護蓋都可以正常操作。此外,半推保護蓋時,畫面就會顯示時間、日期及其他通知訊息,絕對唔係得個玩字,都有實際用途。值得一提,此機亦會預載《Come in&》程式及Widgets,提供《AKA Space》、《Snapsh-OO-t》等內容,前者會連上AKA官方網站,有Wallpaper下載及一系列AKA宣傳活動等內容;後者就可以透過附送的實體公仔玩AR互動拍攝或者將虛擬AKA公仔加落實景。
DIY任意設計
呢部手機另一好玩之處,就係具備DIY元素;跟機已附送多款AKA貼紙,等大家可以將保護蓋粉飾一番,其網站仲不時舉行AKA手機設計活動,好似喺機套加上唔使同Pattern,最常見就係加上嘴巴,令本身有對大眼嘅AKA手機似足個人仔,設計天分高的話,肯定有排玩!規格方面,則屬中階級數,採用Qualcomm 1.2GHz四核心處理器及5吋720P屏幕,同時內置1.5GB RAM及16GB ROM,一般睇片、上網、打機都應付到。機背同樣設有Rear Key,方便單手控制音量及開關,操作方便。
Spec
制式:GSM、WCDMA、LTE
處理器:1.2GHz四核心
記憶體:1.5GB RAM、16GB ROM,支援microSD
屏幕:5吋(1,280×720)
鏡頭:後置800萬像素、前置210萬像素
對外連接:microUSB、NFC、藍芽4.0、Wi-Fi
電池容量:2,610mAh
作業系統:Android 4.4
體積:138.7×71.9×9.9mm
重量:157g
查詢:2374 0618