眾所周知，Nike係運動品牌中嘅「氣功」大師，而佢最有分量、最炫目嘅招數，當然係Air Max，尤其是於2006年面世嘅全掌式設計—Air Max 360，由功能到外觀設計上可說是驚天地泣鬼神，不但只此一家，而且之後每年都不斷改進、升級，其他對手想跟都跟唔到。嚟到新一年，Air Max又發功，首度將全掌式Air Max與完整的工程網眼鞋面（Engineered Mesh Upper）結合，進一步實現品牌嘅Dynamic Fit設計哲學，在任何動態之下，都令用家感到得心應「腳」。

Air Max 2015（男裝）$1,469

Air Max 2015（女裝）$1,469

鞋身兩側都有Flywire加固，而且Air Max 2015所使用嘅Flywire，比其他剔牌跑鞋以至籃球鞋嘅Flywire都粗身得多，支撐效果令人期待。

首度採用工程網眼鞋面，結合Flywire，將輕巧、透氣、靈活及高支撐度等優點集於一身。

注重功能設計之餘，Air Max 2015嘅出位配色組合亦同樣吸引，就連外底都Sharp醒過人。

外底用上抓地力高嘅Waffle紋理之餘，留意前掌區仲加咗凹槽，令鞋底更易緊貼腳形變化。

為咗加強Air Max嘅緩震作用，鞋墊都選用彈性較高嘅款式，設想周到。

由於前、後掌嘅不同緩震需要，兩者嘅充氣量亦有不同，帶嚟至稱身嘅保護作用。

響應今期大熱嘅反光潮流，鞋尾嘅Swoosh商標亦都塗上反光物料。

全掌式緩震

喺剔牌三大氣功招數—Air、Zoom Air及Air Max之中，就以Air Max嘅「氣量」最大，帶嚟分外顯著嘅吸震效果，Air Max 2015嘅中底就用咗全掌式Air Max設計，換言之整個腳掌都可感受到充沛嘅緩震表現，而且Air Max氣墊結合咗凹槽設計，用家由觸地到離地嘅整個腳部動作變化，氣墊形狀都可作出相應調整，而且Air Max與鞋面之間仲有一層Cushlon發揮協調作用，令跑手嘅每一步都做到靈活自如。至於Nike嘅另一獨門招數—「格仔餅」嘅Waffle外底，亦都應用喺Air Max 2015身上，無論喺運動場嘅跑道上，都可發揮出色嘅抓地能力。

鞋面大革新

全掌式Air Max固然係最吸引眼球嘅設計，不過Air Max 2015嘅最大改動，其實在於鞋面結構，繼上一代破天荒採用Flyknit技術後，今代再作突破，首度改用接近無縫嘅工程網眼鞋面，帶嚟輕巧、透氣及靈活三大優點；尤其是喺輕巧方面，Air Max嘅鞋款一向比較有「分量」，對於着慣輕款跑鞋嘅用家而言，難免有所顧慮，不過Air Max 2015透過鞋面結構嘅改動，就以男裝（US10）及女裝（US8）為例，分別只重351g及290g，平均比上一代輕咗接近50g。不過輕還輕，Air Max 2015未有犧牲穩定性，反而再作提升，事關鞋身兩側都有Flywire與鞋眼連接，索緊鞋帶後就會帶嚟充足嘅支撐作用，穩穩陣陣又舒舒服服地包實腳掌，避免因腳掌於鞋籠內過分晃動而扭傷。

查詢：2174 6938（銅鑼灣加寧街Nike Running Experience Store）