鍾意變形金剛，唔止因為識變形，仲有合體呢招同樣煞食，好似G1時代嘅建造派（Construction）、萬能喪士（Menasor）及飛天派（Superion，又名大無畏）等等，無論係五合一或者六合一，合體之餘，分體後每部機體依然變到形，差唔多30年前嘅設計已經走到咁前，不得不寫個服字。咁有Gimmick嘅招數，自然成為Hasbro嘅吸金殺着，全新版本嘅飛天派就剛剛上場，保留原有特色之餘，仲多咗「百搭」呢項新玩意。

1986年嘅元祖飛天派造型都幾四平八穩，同個「帥」字大纜都扯唔埋。

連文哥都可以玩合體，身為粉絲都幾難抗拒，不過實話實說，合體後嘅文哥，似乎唔夠飛天派順眼。

Optimus Prime
建議零售價︰$269.9

Alpha Bravo
建議零售價︰$159.9
原本嘅飛天派，五機都係戰鬥機，新版本嘅Alpha Bravo就變做直升機，專責對地支援，算係聊添新意。

Firefly
建議零售價︰$159.9
根據官方資料，Firefly嘅戰機形態係美軍已經退役嘅F-4 Phantom II，不過高單翼嘅造型，其實似AV-8B Harrier II多啲喎。

Drag Strip
建議零售價︰$159.9
最出位都係你，身為狂派竟然同博派合體，唔通棄暗投明？至於佢嘅F-1賽車形態，官方資料話極速可以去到250km/h，不過速度愈高，份人愈易抓狂。

Skydive
建議零售價︰$159.9
同Firefly一樣，官方資料話可以變成F-16，但係眾所周知F-16 Falcon係單尾翼機種，Skydive係雙尾翼喎，話佢似F-18 Hornet仲多人信。

Silverbolt
建議零售價︰$269.9
由元祖到新版，都可以變成和諧式超音速飛機（Concorde），身為飛天派嘅領袖，不過據講其實有畏高症，飛機都會畏高？唔理喇，最緊要好打嘛！

老變世界中，最出名嘅合體戰士非建造派（左）莫屬，好彩博派後嚟都有飛天派（右）幫手，否則點夠狂派打？

元祖版本嘅飛天派早於1986年推出，有齊故事中變形、合體等招數，不過「好景不常」，廠方想食住《Transformers︰Revenge of the Fallen》上畫嘅氣勢，於2008年推出新版飛天派玩具，合體呢招係保得住，但除咗作為主體嘅灰甲（Silverbolt）分體後依然變到機械人及戰機外，其餘四子就只有戰機形態，咁樣打斧頭，玩味當堂大插水，市場反應亦都好一般。

無間道狂派突入

痛定思痛，Hasbro於今年推出全新系列—Transformers Combiner Wars，顧名思義，箇中機體大玩合體元素，打頭陣嘅就係飛天派，沿用五合一設計，最重要係五機分體後各自識變形，玩味返晒嚟。不過喺角色方面，原本嘅空襲（Air Raid）唔見咗人，反而由狂派嘅迪士龍（Drag Strip）取代，點解咁奇？至今官方依然賣關子。

講番今次新版飛天派嘅賣點，由四機加一車組成，首先每部機體本身都有唔錯嘅可動性，肩、肘、髖、膝都識郁，筆者最鍾意係頭部有若干幅度可以抬起，可以擺出招積甫士。至於合體後亦都有齊以上嘅可動性，仲多埋手腕、手指及足踝等關節位，不過變成巨人之後，難免頭重腳輕，接地性自然差啲，尚可原諒，真正美中不足係造型上有少少手長腳短，帥氣打折扣。

手腳無限Crossover

保留變形、合體元素，造型上亦比元祖版本靚仔得多，都係新版飛天派嘅賣點，不過都只係意料之內，真正驚喜係加入百搭元素。原本嘅飛天派，合體之後邊個做手、邊個做腳都講到明，新版本就冇咗呢個限制，無論係跳槽嘅迪士龍，定係原有班底嘅先鋒（Alpha Bravo）、天敵（Skydive）及飛天火（Firefly），任何一位都可以充當手腳，而且冇左右之分，事關合體後無論手腳位置，都用咗相同嘅榫位連接，咁講法，如果Hasbro真係出埋萬能喪士嘅話，佢同飛天派咪可以嚟個無限Crossover？到時真係難為正邪定分界了。為咗證明百搭新招有幾好玩，Hasbro今期仲出埋Combiner Wars版本嘅「文哥」柯柏文（Optimus Prime），可以變做貨櫃車拖頭之餘，亦都可以玩合體，代替灰甲同其餘四子結合，變成終極柯柏文（Ultra Prime），玩到咁絕，睇怕遲啲麥加登（Megatron）都唔少得呢招，老變死士嘅血汗錢，相信凍過水了！

查詢：2738 8300（Hasbro HK）