2015科技爆錶

今年科技界最緊要識睇「錶」！無論大廠定細廠都紛紛加入智能手錶市場，而Apple Watch亦如箭在弦，話明於年初推出，足證智能手錶將會大行其道。2015年，智能手「錶」，你有冇？

智能手錶篇愈出愈勁
Apple Watch既有平價鋁殼膠錶帶運動版外，亦有18K鍍金尊貴版，選擇多元化。

2014年好多廠商都加入智能手錶市場，其中Moto 360就是備受好評的型號之一。

Apple Watch設計時尚，並可更換錶帶。

電腦篇 5K彈起
新款27吋5K iMac是第一部內置5K屏幕的一體化電腦，相信今年內可吸引到對手跟風。

Dell剛在外國推出27吋5K電腦屏幕，價錢唔平；但只要更多品牌爭相出機，唔使雙辣招都冧價。

電視篇曲面、量子上位
好多電視廠商將會推出曲面電視，機身可彎可直的設計都有望今年推出市場。

LG預先張揚會在CES上展出應用到Quantum Dot色彩技術的55、65吋超高清電視，有幾靚真係要睇過實物先知。

手機篇曲芒玩嘢
2014年年尾上場的Samsung Galaxy Note Edge用上曲面側芒設計，擴闊曲芒的應用。

有傳Samsung Galaxy S6會用雙曲面側芒，亦有傳用全鋁邊框設計，但可信性不高。

香港資訊科技商會榮譽會長方保僑

智能手錶篇愈出愈勁

今年智能手錶絕對可以獨當一面，其中極度教人期待的Apple Watch預計在今年年初發售，樣靚、款多、可換錶帶，兼可對應Apple Pay畀錢（暫時得美國做到），功能多多。Apple Watch有埋18K鍍金版，相信目前大家最關心係到底定價幾多、幾時出，同炒唔炒得起，各位「果農」記得留意！至於其他品牌智能手錶都愈做愈多功能，如Samsung Galaxy Gear已推出到第三代，Sony、LG、Motorola都推出自家的智能手錶，相信今年Android系列亦有排鬥「智」喇！

電腦篇 5K彈起

二合一裝置可唔可以取代到平板或手提電腦？2015年都應該未得，頂多只會升級新架構處理器，再因應新處理器出新機，認真無限Loop。反而個人電腦屏幕就應該會推進到5K顯示，好似2014年年底，Apple就有部27吋5K iMac，而Dell都正式推出5K電腦屏幕，雖然目前價錢仍然好貴，但假以時日應有更多廠商加入戰團，從而令售價下調，今年換部5K顯示電腦都係時候。

電視篇曲面、量子上位

2015年電視仍會以4K顯示搭曲面設計為主調，不少二線廠都加入曲面電視市場，到時價錢亦會有好大下調空間，因此大家諗住新一年買電視的話，記得留定個弧形吉位。今年好有機會量產可彎可直的Flexible、Bendable電視，不過價錢應再貴一級，睇定啲好。至於顯示技術方面，LG事先張揚會在下星期CES展上發布採用Quantum Dot（量子點）色彩技術的55、65吋超高清電視，賣點是可以顯示出更廣闊色域及改善色彩飽和度。

手機篇曲芒玩嘢

除了升級處理器、機身造得更薄，以及推高鏡頭像素等指定動作外，今年手機芒應會所變革。2013年年底Samsung Galaxy Round跟LG G Flex係第一代曲芒，屬試水溫之作；上年年底推出的Samsung Galaxy Note Edge加入單邊曲芒設計，姑勿論實際功用有幾多，但真係有驚喜。相信到今年應會推出有型而又實際的曲芒手機，傳聞話Galaxy S6會用上兩側曲芒設計，小記就覺得有芒咪曲住先囉。