今時今日睇電視一台獨大，不勝唏噓，想當年80、90年代，兩台鬥播人氣動畫，筆者就最鍾意喺大台睇完《魔神英雄傳》，轉台睇《NG騎士》，見證當時嘅Q版機械人熱潮。呢股Q版風氣最近喺商品界捲土重來，除咗有Robot魂嘅《魔神》系列，就連港產Action Toys都參戰，即將推出ES合金最新作品—《NG騎士》主角機「金戰士」。筆者有幸率先試玩，發覺獅子變形跟足原著，扭法巧妙又紮實，合金量及電鍍效果亦交足誠意，Bling Bling閃爆鏡！

翻出獅頭及前爪，將雙腳變成後腿，最後將盾牌安裝喺背部，繼而張開雙翼，金獅子變形就大功告成。

ES合金Series 16 King Sccasher　參考售價：¥8,800

頭雕造型似足原著，留意額頭兩支可動角並非軟膠製，變形要小心。

變形系統最精彩之處，在於拉出身體揭開外殼，將獅頭翻出並將頭部收納，轉動位置拿捏準確，唔易刮花電鍍面。

金色電鍍表面平滑精緻，唔會有起泡或顏色一撻撻嘅QC問題。

配件方面，除咗有主要武器勇者之劍及盾牌外，仲有埋回力鏢、飛鏢及棍錘，相當齊料。

唔計當年Takara出品，今次ES合金「金戰士」並非自此一家，原來Bandai附屬公司Megahouse亦曾兩度改良推出合金變形玩具，不過都係關節鬆散、邊玩邊甩。

變形夠紮實

ES合金就絕對冇呢個問題，除咗上述提及嘅關節補強，變形結構亦都落咗好多工夫，原著中金獅子嘅頭部，要先揭起身體，才可以向外翻出，再將金戰士嘅頭部收納其中，而小腿外甲又要成塊拉出嚟，再往上嵌入髖關節，變成獅子嘅強壯後腿，為怕變形過程容易刮花部件，Action Toys於髖部及下腹特別Set咗兩組拉出式關節，避免扭動時組件之間受到碰撞而出現損耗，而且額頭及大腿專登用金色塑膠部件製成，就算玩得粗魯有閃失，都唔易刮甩電鍍層。

含金量有驚喜

ES金戰士全身嘅支撐部分都用Diecast製作，包括身體、肩關節、腿內支架及小腿外甲，墜手程度拍得住合金魂，表面仲有閃令令嘅電鍍金，金屬感一流。不過多咗合金重手咗，關節負苛都難免增加咗，要兼顧機體紮實扭動，於是受力處用咗齒輪關節，又用埋大口徑樁榫，扭得多都唔易斷。

C.Production Reed 1990

查詢：2390 9843